O tempo acabaselle á AD Cortegada para poder permanecer na Liga Feminina 2, pero aínda quedan puntos en xogo. Os seguintes dous diputaranse este sábado, 13 de febreiro, ás 19:00 horas no pavillón de Fontecarmoa ante o GDKO Ibaizabal.
Un rival nada fácil. Con 11 vitorias (unha delas na ida ante as galegas) e 8 derrotas, e un partido máis disputado, as vascas ocupan a sexta posición, seis puntos por riba das galegas.
Pola contra, o Cortegada segue unha xornada máis penúltimo, con 22 puntos e 4 vitorias fronte ás 14 derrotas. Con todo, está a un punto do duodécimo e a dous do undécimo, décimo e noveno, polo que na LF2 nada está decidido.
Ademais, as de Vilargarcía chegan en bo estado físico e anímico. A pasada fin de semana fixéronse co derbi pontevedrés ante o CB Arxil, un paso importantísimo por sumar os dous puntos e obtelos ante un rival directo e sumar tamén o basket average. As de Pontevedra están un posto por riba das arousás cun punto máis.
Enfronte das galegas este sábado estará un conxunto vasco cunha media de valoración que roza os 60 puntos, e que destaca polo seu acerto nos tiros libres. Con todo, nesta área do xogo o Cortegada é superior, se ben é menos efectivo nos tiros de campo.
Ademais, o Ibaizabal xogará en Vilagarcía con ganas de engadir outro trunfo á súa racha, na que levan xa catro partidos gañados consecutivamente.
O último deles foi ante a ADBA, nun encontro no que só cederon momentáneamente no terceiro cuarto, para asinar finalmente a vitoria por máis de dez puntos de vantaxe.
Juana Molina, unha das baloncestistas máis destacadas do club vasco volveu a liderar ao seu equipo, sendo a MVP do duelo. Con 14 puntos e a escalofriante cifra de 16 rebotes Molina será o principal problema do Cortegada.
O duelo disputarase a porta pechada, pero poderá seguirse a través do streaming do Canal Feb.
