Dous partidos e dúas oportunidades para a AD Cortegada de rematar coa peor racha de derrotas da Liga Feminina 2. Con dous encontros en casa, o sábado recibirán ao Magec Tías “Contra la Violencia de Género” e o domingo ao Osés Construcción Ardoi.
De novo, as galegas deberán disputar dous partidos nunha mesma fin de semana. Algo que non parece ser o máis favorable para o conxunto ás ordes de Rubén Domínguez. A semana pasada, as galegas colleitaron dúas derrotas.
https://asnosas.gal/fin-de-semana-de-derrotas-para-a-ad-cortegada/
Dous rivais moi dispares para o Cortegada
Desta vez, o primeiro partido, do sábado, 12 de decembro, semella máis adsequible. Será contra o colista da categoría, un Magec Tías que acumula unha racha de catro derrotas e que non puido jugar os seus dous anteriores partidos.
Un falso positivo detectado no club canario obrigou a adiar os encontros contra o Ulla Oil Rosalía e o CB Arxil. O sábado, volven á competición necesitadas dunha vitoria para saír da zona de descenso.
O Cortegada só ten dous puntos máis que as canarias, ao acadar unha vitoria máis ao xogar tamén un partido a maiores. Con todo, e aínda que as galegas teñen máis acerto desde a liña de tres e puntuan máis, as visitantes teñen unha mellor media en tiros de campo.
Tamén é superior o seu tiro de tres, polo que o cadro de Domínguez deberá concederlles menos ocasións a esa distancia.
Máis desigualado estará o partido do domingo. Galegas e navarras disputarán o partido adiado da primeira xornada. O Ardoi, actualmente cuarto clasificado, será un rival moi duro para o equipo de Vilagarcía.
As navarras veñen de lograr unha vitoria contra o Celta Zorka Recalvi e outra contra o Maristas Coruña. Ademais de plantarlle cara ao líder, o BAXI Ferrol no seu encontro da novena xornada. O día anterior, enfrontaranse ao Ulla Oil Rosalía.
As galegas deberán ser fortes en ataque e, en defensa, vixiar a Josephine de Barros, unha das máximas anotadoras de tiros de dous puntos da categoría. Tamara Montero tamén será un rival duro desde a liña de tiro libre, onde é case infalible.
Fontecarmoa terá movemento continuo esta fin de semana, na que o Cortegada poderá decidir o seu futuro na Liga Feminina 2. Se deixa atrás a racha de cinco derrotas consecutivas, podería comezar a acumular bos resultados e sensacións que as alonxen do descenso.
