O cambio no banco do AD Cortegada semella dar resultados. Rubén Domínguez deixou a dirección técnica do equipo de Vilagarcía e, coa chegada de Javier Nogueira, chegan tamén os resultados. O sábado, lograron unha vitoria ante o Magec Tías “Contra la Violencia de Género”, cun 86-72 e o domingo caeron cun resultado axustado contra o Osés Construcción Ardoi, 60-68.
O Cortegada acumulaba antes da duodécima xornada nuha racha de cinco derrotas consecutivas, que as empurraban á parte baixa da clasificación da Liga Feminina 2. Agora, tras o triunfo contra o Magec Tías, as galegas afiánzanse na novena posición.
Cara
O sábado, o Cortegada recibía ás colistas na súa pista. O partido presentábase igualado ante un cadro canario que precisaba unha vitoria despois de catro derrotas e dous partidos sen poder xogar.
Pero o conxunto ás ordes de Javier Nogueira pisaron o acelerador e dominaron o partido. Xa no primeiro cuarto, as galegas case lograron duplicar os tantos das rivais, asinando un contundente 29-17 que marcaría a tónica do partido.
Para o segundo tempo, o acerto do Cortegada en ataque seguiu dando os seus frutos cun resultado moi similar antes da pausa, que adiantaba ás arousás cun 52-34 no marcador dun partido que semellaba sentenciado.
Á volta de vestiarios as visitantes conseguiron frear un pouco ás locais, pero non tiveron moito acerto fronte á canastra, o que se traduciu noutro cuarto a favor das galegas.
A sorpresa case chega nos dez últimos minutos, cando o Magec Tías colleu ritmo e invertiu o resultado do primeiro tempo, desta vez cun 15-28 ao seu favor. A odisea da canaria Regina Gómez, MVP do partido, anotando 32 puntos dos 72 do seu equipo, non foi suficiente para lograr a remontada.
E cruz
Menos sorte terían as de Vilagarcía ao día seguinte, no encontro contra o Ardoi, un dos equipos máis fortes da competición. O duelo prometía ser moi difícil, pero as boas sensacións do sábado extendéronse ao domingo e o Cortegada foi digno rival do segundo mellor equipo da LF2.
O Ardoi chegaba dunha vitoria ante o Rosalía, facéndose cada vez máis forte na categoría, e repetiu puntuación, marcando 68 tantos a ambos galegos.
A cita comezaba coas navarras tomando a iniciativa, ante unhas galegas que plantaban cara e con acerto nos tiros de dous. O primeiro tempo rematou cun axutado 17-21 que deixaba tempo para a esperanza das locais.
No segundo cuarto, as distancias aumentaron sensiblemente, levándose o encontro ao descanso o Ardoi por oito puntos. Para a volta da pausa, as xogadoras de Nogueira demostraron que non daban nada por perdido e loitaron por levarse o cuarto, situándose a dous puntos do rival.
Finalmente, o último tempo foi para as navarras, que sentenciaron o partido cun 60-68 final, sendo notablemente superiores desde a liña de tres (cun 42% de acerto).
Malia a derrota, o MVP foi para Cristina Loureiro, autora de 15 tantos (a segunda máxima anotadora por detrás de Amaya Gastaminza) e seis rebotes.
O próximo reto do Cortegada
Para esta fin de semana, o Cortegada viaxará a Asturias para enfrontarse o sábado, 19 de decembro, á Asociación Deportiva Baloncesto Avilés. Un partido que pechará a primeira volta da competición e no que a vitoria será vital, ante un rival directo na loita pola permanencia.
