Coa Liga Feminina 2 a piques de rematar na súa primeira fase, dous equipos das Rías Baixas teñen unha cita pendente. AD Cortegada e Celta Zorka Recalvi recuperan a 17ª xornada este mércores, 17 de febreiro, ás 19:00 horas.
O pavillón de Fontecarmoa será o escenario onde se enfronten estas galegas, que tiveron que reaxendar este encontro debido aos casos de COVID-19 que destectaron as celestes a finais de xaneiro.
Coa celebración deste partido, ambos conxuntos estarán xa ao día no que se refire ás xornadas e só terán dous máis por diante para cumprir os seus obxectivos na Liga Feminina 2.
Metas distintas para Cortegada e Celta
Obxectivos que son moi dispares para o Cortegada e para o Celta. As primeiras seguen en perigo de descenso, malia que as últimas xornadas lle serviron para desmarcarse lixeiramente da posición de colistas.
Malia seguir a un punto do faroliño vermello, as de Vilagarcía pasaron da penúltima posición na 20ª xornada, á undécima na presente. Así, dous equipos (Magec e Rosalía) serven de colchón ás de Nogueira para evitar a praza de descenso.
No outro extremo da táboa está o Celta. As viguesas están en racha e en plena loita por clasificarse no segundo posto, coa mente posta en chegar na mellor posición á seguinte fase, na loita polo ascenso.
Actualmente, as celestes son o segundo equipo en mellor momento, xa que acumulan once partidos sen coñecer a derrota e coa última vitoria, ante o Ardoi, rozan xa ás navarras e están a punto de arrebatarlles a praza de prata.
O último precedente favorece ás celestes
Estes dous equipos xa se viron as caras na primeiras volta, nun encontro disputado en Navia, e no que as locais se proclamaron gañadoras.
A cuarta xornada traía este derbi entre galegas, na que o partido comezou igualado, ata que o Celta Zorka Recalvi desequilibrou a balanza ao seu favor no segundo cuarto. O conxunto da AD Cortegada loitou polo resultado na segunda metade, pero un parcial demoledor das locais setenciou o duelo, no que a protagonista foi unha certeira Davydova.
O Celta Zorka Recalvi vence sen reparos a AD Cortegada 78-43
As últimas xornadas das galegas
Despois deste enfrontamento, vital para a consecución dos obxectivos de cada equipo, as galegas aínda teñen dous compromisos.
No caso da AD Cortegada, a 25ª xornada trae un enfrontamento co Magec Tías contra a violencia de xénero, un rival directo que tamén quere evitar o descenso. Para a última xornada, as de Vilagarcía teñen outro contrincante similar, a ADBA, actual colista.
Pola súa banda, o Celta Zorka Recalvi afronta esta fin de semana o derbi co BAXI Ferrol, nun partido que sen dúbida será a festa do baloncesto galego. As celestes despiden a primeira fase con outro derbi, que as enfrontan ás coruñesas do Maristas.
