Dous equipos galegos de traxectorais ben distintas na LF2 enfrontaranse este sábado, 23 de xaneiro, ás 19:00 horas no pavillón de Fontecarmoa en Vilagarcía. Son a AD Cortegada e o Celta Zorka Recalvi, terceiras pola cola e cuartas por enriba respectivamente.
Dúas posicións alonxadas actualmente por nove puntos e que cambiará tras a celebración deste partido. O Cortegada, que xoga co factor casa ao seu favor, precisa sumar dous puntos que as alonxen da parte baixa da clasificación. Con tres vitorias e trece derrotas, as de Vilagarcía son duodécimas e están a tres puntos do colista.
Pola súa banda, nas últimas xornadas o Celta reencontrouse co seu bo xogo, pero tamén o están a facer os seus rivais directos na loita polo ascenso. Así, despois de catro trunfos consecutivos, as celestes están nunha cuarta posición, a catro puntos das líderes e dous das segundas clasificadas.
Tanto Cortegada como Celta veñen doutro duelo galego
Na anterior xornada, ambos equipos tiveron un rival galego enfronte. No caso da AD Cortegada foi o Maristas Coruña, que impuxo o seu xogo en casa e logrou levarse a vitoria.
Un mal inicio foi demasiado castigo para as xogadoras de Javier Nogueira que non lograron asinar a remontada en terras coruñesas. Con todo, sobresaíu a actuación de Cristina Loureiro, a segunda mellor do partido, logrando 21 dos 55 puntos que anotou o seu equipo.
Pola parte celeste, a fin de semana pasada foi o turno do derbi entre Pontevedra e Vigo, cun enfrontamento ante o CB Arxil. As xogadoras do Celta conseguiron gañar ás veciñas, pero non sen esforzo. O partido, igualado durante os cuatro cuartos, tivo que decidirse no último minuto.
Nas filas viguesas destacou especialmente Maja Stamenkociv, habitual entre as mellor calificadas do Celta. Nesta ocasión, a xogadora logrou 24 puntos de valoración, sendo a segunda mellor do partido.
A ida foi para o Celta
Na primeira volta da competición regular, a vitoria foi para as xogadoras dirixidas por Cristina Cantero. Un partido liderado polas celestes, pero que non terminou de romper ata o terceiro cuarto.
Neste terceiro tempo a defensa do Celta aumentou de nivel, impedindo xa o escaso acerto que estaba a ter o equipo entón ás ordes de Rubén Domínguez. Un Cortegada que foi de máis a menos e quedou sen opcións para a vitoria.
Para esta segunda volta, todo parece indicar que a tónica do partido será similar ao duelo da ida, aínda que as de Vilagarcía teñen marxe para a sorpresa. Por parte viguesa, as celestes non deixarán pasar a oportunidade de afianzarse como un dos mellores equipos da categoría.
O Celta Zorka Recalvi vence sen reparos a AD Cortegada 78-43
