Non é a primeira vez que AD Cortegada e CB Arxil miden forzas na Liga Feminina 2, pero a medida que avanza a tempada, gañar aos rivais directos é cada vez máis importante. Este sábado, 6 de febreiro, ás 19:00 horas vivirase no Fontecarmona de Vilagarcía un duelo vital para o baloncesto galego.
Este “derbi das necesidades” terá ao Cortegada como local e como club que parte dunha peor posición. Con cinco derrotas consecutivas, as de Javier Nogueira ocupan a penúltima posición da táboa a un punto do colista.
Con dúas vitorias máis e só un posto por riba está o Arxil. As pontevedresas tamén intentarán fuxir da zona baixa impoñéndose ante un rival directo. O plantel verde chega en mellor lugar, malia perder o partido de ida.
Na primeira volta este derbi foi para as de Vilagarcía, un equipo que, en palabras do rival, “é moi difícil de sorprender”. O marcador á fin do seu primeiro enfrontamento desta tempada sinalaba o 58-63 á súa fin. Porén, na pretempada, o partido de Copa foi para o Arxil, que logrou vencer cun resultado de 62-38.
A cita retransmitirase vía streaming no Canal Feb.
O Arxil confía na súa última incorporación para vencer ao Cortegada
Para este duelo galego, o bando pontevedrés contará cunha nova xogadora. Trátase de Samra, que se incorporou á disciplina do club esta semana, e poder estrear a camisola verde en Galicia esta fin de semana.
Á súa chegada, a bosnia declarou que “esperaba que as xogadoras foran boas. Isto é baloncesto dun gran nivel e todas as xogadoras son boas”.
Maite Méndez poderá contar con ela para este encontro, así como co resto do plantel. Baloncestistas como Forster, Carla Cristina e Margarita están xa recuperadas, mentres que María Lago segue entre algodóns.
