O A.D. Cortegada fixo público a través dun comunicado o agradecemento aos estamentos do club, á sanidade pública e aos patrocinadores que apoian económicamente ao club galego. A entidade de Vilagarcía tamén explicou a necesidade de realizar un ERTE debido ás dificultades e incertezas económicas.
O club galego quixo agradecer a todas as persoas que están a traballar durante estes momentos de incerteza e medo para que os demais podan cubrir as necesidades básicas: persoas de supermercados, servizos mínimos, seguridade cidadá, profesores… E, como non?, a todos os sanitarios, servizos de limpeza e desinfección e un longo etcétera, que se atopan na primeira liña de batalla contra o COVID-19.
O Cortegada expresou a máis profunda gratitude pola Sanidade Pública, que demostrou a súa fortaleza e importancia. “E, aínda con gran falta de medios polos recortes, conseguiron que España sexa o país do mundo con máis curados de COVID-19“, relata o comunicado.
Agracemento ás xogadoras
Tamén quxieron agradecer ás xogadoras, que durante estes case dous meses, adaptáronse ás difíciles circunstancias que lles tocou vivir. Apoiaron en todo momento ao Club, e entenderon as dificultades polas que estamos a pasar. “E, non só iso, senón que ademais, como poderiades ver, seguiron traballando desde as súas casas, e mostráronnolo a través das Redes Sociais”, reza o escrito.
O comunicado tamén agradece aos máis pequenos do club a súa labor: “Por último, damos as grazas a toda a familia do CLB, adestradores, que se manteñen en contacto cos xogadores da base e mesmo fan adestramentos a nivel online. Á directiva, os pais e aos máis pequenos, que están a demostrar a súa fortaleza ao quedarse na casa para conseguir frear entre todos a este maldito virus… E que ademais o fan cun sorriso na cara, e enviándonos imaxes das actividades que fan para entreterse. Nestes tempos demostramos que somos unha gran familia, e estamos súper orgullosos diso”.
Fin da tempada
A Agrupación Deportiva Cortegada, viuse obrigada a solicitar un ERTE (que lle foi concedido), debido á incerteza e ás dificultades económicas. E é que desde a FEB aínda non se cancelou esta tempada. Nós somos partidarios de que se faga canto antes.
“Primeiro, porque entendemos que non podemos expoñer ás nosas xogadoras a un contaxio, e non cremos que nos meses vindeiros as condicións permitan celebrar os encontros con total seguridade. Segundo, a nivel económico, os clubs máis pequenos non podemos permitirnos esta situación de incerteza na que aínda non sabemos que vai ocorrer. Por iso repetimos o noso desexo de que se tome canto antes a decisión”.
Futuro
Desde a AD Cortegada anunciaron que xa están a traballar pensando no futuro na Liga 2. “Queremos que a tempada que vén sexa unha continuación da deste ano. E para iso seguir co proxecto que empezamos esta tempada, e se é posible coa mesma persoal de xogadoras novas e con gran capacidade de crecemento”.
“Todo iso sendo conscientes das dificultades que se presentarán a nivel económico, xa que a gran maioría das empresas terán que pasar por uns meses difíciles tras esta crise. E entendendo que o primeiro será saír a nivel sanitario, reducir ao máximo os contagios, acabar coas mortes por COVID-19 e salvagardar ás persoas de risco. Conseguir un medicamento, unha vacina…”, relata co comunicado.
O club galego anima á xente a consumir no comercio e a hostalería de Vilagarcía, para entre todos axudarnos a saír canto antes. “A A.D.Cortegada seguirá aquí, pelexando como o fixo outras tantas veces, para seguir traendo o baloncesto á nosa cidade”.
Por último, finaliza cun mensaxe de agradecemento aos patrocinadores do club: “A todas as empresas, afeccionados e colaboradores… expresámosvos o noso máis profundo agradecemento e desexamos que podamos volver canto antes á normalidade. Facemos aquí unha mención especial para os nosos dous principais patrocinadores, kemegal e Rehabmedic, que nestes momentos traballan duramente para poder abastecer ao mercado dos produtos de limpeza, desinfección, e outras medidas sanitarias necesarias”.
