“Por primeira vez desde que xogo a este deporte saín chorando como unha meniña pequena. Cando o árbitro pitou o final sentín a partes iguais impotencia e orgullo; impotencia por un partido máis perdido e porque a pesar de todo o esforzo posto non conseguimos anotar e por outra banda, saín orgullosa por deixar os folgos no campo”. Estas son as palabras dunha xogadora, Coral Núñez, do Pontevedra Rugby Club (PRC), que exemplifican as sensacións que se viven no club tras o quinto encontro perdido.
A tempada segue atragoándoselle ás xogadoras do Pontevedra RC, que suman outra derrota contundente ao seu casilleiro na División de Honor B. As Irmandiñas non foron capaces de competir contra o recentemente descendido Crealia El Salvador, que levouse o partido en casa por un 91-0.
O esforzo e ilusión que poñen as galegas sobre o campo non se traducen en bos resultados, por moito que o intenten. A falta de experiencia é un castigo que lastran no conxunto ás ordes de Alberto Fernández, e que precisa de tempo e práctica para solucionarse.
Cinco minutos foi o tempo que aguantaron as xogadoras do PRC sen recibir un ensaio en contra. Alba Alpín foi a autora do primeiro try para as locales, abrindo un festival de puntos para o El Salvador. A partir dese momento, case cada cinco minutos o marcador das locais aumentaba, mentres que as Irmandiñas nin atopaban a fórmula para frealas nin eran quen de achegarse á meta contraria.
Alpín repetiría como anotadora en tres ocasións máis, pero o boom de ensaios e transformacións chegou da man de Blanca Martín. A 21 anotou 14 puntos en cuestión de cinco minutos, entre o 48 e o 53, para engadir outro try no minuto 58, unha transformación no 61, outra no 69 e finalizar o encontro con nove puntos máis no tramo final do partido.
Xunto a elas, tamén se sumaron a esta sangría das galegas xogadoras como Lara Borondo, Lucía Diego, Petrina Moir, María Miguel, Noelia García e Paula Ruíz.
As diferenzas de nivel son moi notables entre un equipo con experiencia na máxima categoría e outro formado con xogadoras de distintos clubs de rexional. “A pesar de que estamos moi ben físicamente, elas estaban un pouquiño mellor”, declara Coral.
Coral Núñez: “Foron 80 minutos de pelexar, defender, placar, levantarse e resistir”
A xogadora asegura que todo o plantel galego deixou a pel no campo vallisoletano. “Foron 80 minutos de pelexar, defender, placar, levantarse e resistir minutos que en ocasións semellaban eternos, tamén de aprender, coñecer xente e cometer erros que no futuro nos están convertendo en mellores xogadoras”, recorda.
O lado positivo da derrota
Malia os malos resultados deportivos, no Pontevedra RC prefiren mirar o lado positivo. Tal e como recalca a xogadora galega Ana Rodríguez, “aínda que quedan cousas por pulir, no campo refréxase o traballo que estamos facendo nos adestramentos, como se pode ver no caso das touch“. Segundo a Irmandiña, os palos na competición forman parte dun proceso que están intentando desfrutar ao máximo. “Toca seguir traballando!”, declara.
Ana Rodríguez: “Toca seguir traballando”
Nesta liña coincide Coral, recalcando que “está claro que cada día xogamos mellor a pesares dos resultados. Contra todo pronóstico rodéanos unha sensación de equipo desbordante, pois ó fin é o cabo fai un ano eramos rivais e se xa era unha maravilla xogar contra elas, non vos podedes imaxinar o que é telas no mesmo equipo e que che den un pase de balón para intentar gañar todos os metros que se poida”.
Coral Núñez: “Contra todo pronóstico rodéanos unha sensación de equipo desbordante”
A 14 do PRC quédase co bo de competir ante un rival superior: “Gústanme este tipo de partidos, pois enfrentarse a un rival duro fai que en cada partido xoguemos un pouco mellor e sexamos capaces de ver os nosos fallos para, no seguinte, intentar melloralo”.
Orgullo polo deporte oval
Se algo demostran xornada tras xornada as Irmandiñas é o seu amor polo rugby. Non importan os quilómetros percorridos en autobús, as contundentes derrotas ou a falta de experiencia. As galegas teñen claro que o deporte oval é a súa paixón.
Coral Núñez sinala ás súas propias compañeiras como fonte de inspiración e exemplos a seguir para seguir crecendo na competición. “Cada vez que disputamos un partido saio do campo querendo parecerme a algunha das miñas compañeiras, ter a tenacidade dunha dianteira que non se cansa de placar, o liderazgo da nosa capitana que de vez en cando, nos da un toque de atención, de unha medio melé que toma decisións máis rápido que a velocidade da luz e dunhas tres cuartos que corren, placan, patean e que ata berran (isto último é unha broma colectiva)”, aclara.
Coral Núñez: “Cada vez que desputamos un partido saio do campo querendo parecerme a algunha das miñas compañeiras”
Para a xogadora, formar parte do PRC con todo o que iso conleva é un dos mellores momentos do ano, desfrutando dun deporte que “deixache feridas na pel e unha vida cargada de mulleres as que querer parecerte”.
Felicitación para as Leonas
Á fin do encontro entre El Salvador e o PRC, xogadoras de ambos equipos quixeron felicitar ás Leonas. A Selección Española de rugby feminino ven de vencer á Selección Rusa, dando un paso cara diante para competir no Mundial.
➡️Las jugadoras de #Crealia @chamirugbyfem y @PontevedraRC han felicitado tras su encuentro de la #DHBFemenina a las #LeonasXV🦁 de la @ferugby 🇪🇸 por su gran partido ante Rusia 🇷🇺
¡Bravo, Leonas! pic.twitter.com/Wj3PWN5Dnd
— SilverStorm El Salvador🏉 (@Chami_Rugby) February 20, 2021
As ‘Leonas’ vencen ás ‘Osas’ e avanzan cara ao Mundial de Rugby
FICHA TÉCNICA
91) CREALIA EL SALVADOR: Rebeca Tascón, Paula Arévalo, Mariana Martínez, Bárbara Bernardos, Ana María Gutiérrez, Ainara Tourlet, Irene Alonso, María Miguel, Isabel Sierra (capitá), Alba Sepín, Noelia García, Lucía Diego, Victoria Rodríguez, Lara Borondo e María Díez. Tamén xogaron: Mónica Tascón, Noelia García, Andrea Múñoz, Sara Andrés, Petrina Moir, Blanca Martín, Paula Ruiz e Elisa Castro.
0) PONTEVEDRA RC: Antía Fraga, Paloma Delgado, Nuria Diéguez, Patricia Lamas, Alba de la Fuente, Sara Antúnez, Laura López, Teresa Gálvez (capitá), Lucy Villar, Mónica García, Sara López, Cristina Ortigueira, Azucena Alonso, Coral Núñez, María Abel. Tamén xogaron: Ana María Rodríguez, María del Carmen Rodríguez, Marina López, Verónica Feteira, Sabela Chan, María Álvarez, Sara García e Paula García.
ÁRBITRO: Santiago Castro.
INCIDENCIAS: Partido correspondente á xornada 5ª da División de Honor B de rugby feminino disputado no Campo Rugby Pepe Rojo.
