- A primeira xornada da I Copa Irene González Basanta comezará ás 15.00 horas na Cidade Deportiva da Torre Arsenio Iglesias na Coruña
A Coruña acolle hoxe xoves 6 e mañá venres 7 de abril a I Copa Irene González Basanta, un torneo internacional en categoría xuvenil feminina que supón unha iniciativa pioneira a nivel nacional. O torneo se disputará nos campos de fútbol da Cidade Deportiva da Torre ‘Arsenio Iglesias’. O Concello da Coruña patrocina a cita deportiva.
Ademais de contar co Orzán SD, a I Copa Irene González Basanta contará con destacados equipos nacionais e internacionais. Trátase de Manchester City, o Real Madrid e o Sporting Clube de Braga, convidados desta primeira edición. A I Copa Irene González Basanta comezará mañá, coa disputa dos partidos correspondentes á primeira fase. Neste tramo do torneo, a duración dos partidos será de 45 minutos, sen descanso.
O venres 7 disputarase a fase final do torneo, coas semifinais e a final, ideadas baixo un formato de partidos cunha duración dunha hora (dúas partes de 30 minutos e un descanso de 10 minutos). En caso de empate, habería unha quenda de penaltis. O primeiro e o cuarto clasificado da primeira fase xogarán ás 10.00 horas, o segundo e o terceiro clasificado farán o propio ás 11.15 horas e a final da Copa entre os conxuntos gañadores será a partir das 12.45 horas.
Os partidos poden seguirse ao vivo na Cidade Deportiva da Torre e tamén na canle de YouTube do Orzán SD.
O legado dunha pioneira, a coruñesa Irene González Basanta
O torneo renderalle homenaxe a unha pioneira do fútbol feminino, a coruñesa Irene González Basanta, que a comezos do século XX desafiou os estereotipos da súa época e cumpriu o seu soño de xogar ao fútbol, chegando a fundar un club na cidade, o Irene Fútbol Club, no que ela era a única muller do equipo, sendo ademais a capitá.
Horarios da primeira xornada
HORARIO EQUIPOS
- 15.00 horas Real Madrid – Manchester City
- 16.00 horas SC Braga – Orzán SD
- 17.00 horas Real Madrid – SC Braga
- 18.00 horas Manchester City – Orzán SD
- 19.00 horas Real Madrid – Orzán SD
- 20.00 horas Manchester City – SC Braga
