Cunha estrea no calendario baixouse o pano da Copa Galicia de Cross Country Olímpico 2021. A primeira edición do XCO Kiwi Atlántico coroou este sábado en Ribadumia aos doce gañadores dos rankings deste certame autonómico e ofreceu dúas master class nas probas raíñas, unha da elite Lara Lois (Extol MTB Team) e outra do sub23 Iván Feijoo (BH Templo).
Nesta proba, a campioa galega volveu demostrar o seu talento, consumando o pleno de vitorias na Copa Galicia XCO.
Despois de non poderse celebrar no 2020 por mor da pandemia, a competición galega reactivouse este ano cun calendario composto por catro eventos. Comezou na Cañiza, pasou por Cambre e Maceda, e concluíu na proba organizada polo Club Ciclista Ribadumia.
A cita na comarca do Salnés reuniu a 180 participantes nun trazado cunha porcentaxe de pistas forestais máis alta do habitual nesta especialidade do BTT, debido aos permisos recibidos de Medio Rural.
Pleno de vitorias para Lara Lois
A actual dominadora do XCO galego compareceu no segundo bloque de carreiras. Lara Lois selou un pleno de vitorias nesta edición da Copa cruzando a liña de meta do XCO Kiwi Atlántico cun tempo de 1 hora 24 minutos e 47 segundos.
A grovense do Extol MTB Team superou con moita comodidade a outras dúas corredoras da categoría Elite: Diana Blanco (Bicicletas Chinquena) e Desiree Fernández (Rsbike Boiro), segunda e terceira respectivamente.
Outro dobre éxito, triunfo no XCO Kiwi Atlántico e na Copa, asinouno Laura Mira (Avanza-O Porriño) nas juniors e as súas compañeiras de equipo coparon os podios cadetes.
Segundo informa a Federación Galega de Ciclismo, nun duelo fratricida a tres bandas, Uxía Soto adxudicouse a vitoria parcial e superou na xeral a Aroa Otero, que chegaba como líder. Terceira en ambas clasificacións rematou Marta Estévez.
En canto ás másters do XCO Kiwi Atlántico, Eva Ortega (Biciosos Rías Baixas) foi a máis rápida no circuíto do Salnés e Silvia García (Bici Verde) conservou o primeiro posto no ranking. A nómina de campioas da Copa completouna a sub23 Noela Saa (Academia Postal – Abanca).
