Carral xa ten data para celebrar a II Copa Galicia XCM: será o domingo, 6 de agosto. A proba, que busca dar continuidade á VI BTT de Carral, viviu no ano 2022 a súa primeira edición asinando un éxito en cifras de participación, con máis de 400 inscritos.
O alcalde, Javier Gestal, o concelleiro de Deportes, Francisco Bello, e Enrique e David Maroño, do Club BTT Carral, presentaron, esta semana, o certame.
Esta proba forma parte do que será a última Copa Galicia de BTT do 2023, a da modalidade de Cross Country Maratón. A competición que chegará a Carral en agosto ponse en marcha este domingo 30 de xullo na Viveiro Bike Xtreme.
Esta proba da II Copa Galicia XCM, organizada polo Concello de Carral e o Club BTT Carral, busca cumprir os seguintes obxectivos: promover a práctica deportiva entre a veciñanza, dar a coñecer a vila e as paraxes naturais e históricas do municipio e, por último, fomentar o emprego da bicicleta nos desprazamentos.
Onde inscribirse na proba de Carral?
As inscricións poden realizarse a través da páxina web da Federación Galega de Ciclismo. As persoas interesadas deberán elixir entre tres posibles percorridos. Por unha banda, poderán escoller a ruta longa, de 60 km. Pola outra, terán a posibilidade de realizar unha ruta curta de 45 quilómetros e, por último, haberá tamén unha terceira alternativa de paseo de 25 km.
As categorías en liza nesta proba da II Copa Galicia XCM, segundo informa a web da Federación Galega de Ciclismo son: Sub-23 Feminino, Sub-23, Máster 60 Feminino, Máster 60, Master 50 Feminino, Máster 50, Máster 40 Feminino, Máster 40, Master 30 Feminino, Máster 30, Junior Feminino, Junior, Élite Feminino, Élite, Cicloturismo, Ciclismo para todos.
Ao remate da xornada, farase unha entrega de trofeos aos tres mellores equipos. A clasificación levarase a cabo tendo en conta a suma dos tempos dos tres primeiros corredores de cada grupo que realizaran o percorrido completo da ruta longa en menos tempo.
A Copa Galicia XCM todo un repóker de maratóns sobre rodas con inicio en Viveiro
