Chega a gran cita do atletismo en pista cuberta en Galicia e a cidade que a acolle é Ourense. Toda unha fin de semana dedicada ao atletismo coa celebración da XVI Copa Galicia de Clubs Absoluta en Pista Cuberta e a III Copa Galicia de Clubs Máster en Pista Cuberta no recinto de ExpoOurense. A primeira se celebrará hoxe sábado 11 e cita dos maiores de 35 terá lugar mañá domingo 12.
Hoxe, sábado día 11, comeza o encontro na categoría absoluta na que oito equipos en ambas categorías tentarán loitar polo tan ansiado premio colectivo do atletismo galego. En categoría feminina participarán os seguintes oito clubs galegos:
- Ría Ferrol
- Atletismo Femenino Celta
- Sociedad Gimnástica de Pontevedra
- Atlética Lucense.
- ADAS
- Atletismo Narón
- Lucus Caixa Rural Galega
- A. Santiago.
Segundo explica a Federación Galega de Atletismo na súa previa, “o Atletismo Feminino Celta e a Sociedad Gimnástica de Pontevedra que parten como favoritos, aspiran a revalidar o título conseguido o ano pasado e onde os pontevedreses veñen gañando de maneira ininterrompida nas últimas sete edicións, polas catro das celestes”.
Con todo, desde a Federación Galega de Atletismo advirten que a pesar das estatísticas, “prevese un interesante duelo nas probas femininas onde o Ría Ferrol tentará de novo conseguir un triunfo cuxo último remóntase ó 2015 e onde terá que pelexar ademais a priori coa Gimnástica para eses postos de podio”.
Consulta aquí os clubs clasificados para a proba da XVI Copa de Galicia de Clubs en Pista Cuberta categoría absoluta
Novidades para as atletas en categoría máster
Xa na xornada dominical entrarán en liza nesta cita copeira os deportistas máster. A principal novidade ven dada precisamente no camiño andado en igualar a competición entre categorías masculina e feminina. En concreto, na categoría máster este ano mulleres e homes terán por vez primeira as mesmas probas.
Esta é a terceira edición desta competición no ámbito galego. En anos previos a categoría feminina carecía de competición nas disciplinas de como salto con pértega e triplo salto. Esa circunstancia fai que aumente o número de atletas féminas que se preparan para estas modalidades a conciencia e que se aumente o número de atletas ao buscar deportistas que afronten esas probas con garantías. Un mal resultado repercutirá negativamente na puntuación do club.
En categoría feminina os clubs que van competir nesta cita autonómica son os cinco seguintes:
- Samertolameu
- Independientes A Estrada
- Atletismo A Silva
- Atletismo Sada
- Atletismo Narón
En categoría masculina hai tres clubs máis que competirán nesta III Copa de Galicia de Clubs Máster en Pista Cuberta. En concreto trátase do Ourense Atletismo, o Marineda Atlético e finalmente o Club Atletismo Santiago.
Contan desde a Federación Galega de Atletismo que nesta terceira edición na categoría feminina todo parece indicar que “será novamente o Samertolameu quen contará con máis opcións de poder repetir os dous títulos conseguidos en edicións anteriores sen esquecernos nin do Club Atletismo Sada, nin do Club Atletas Independente da Estrada que entran nas quinielas para os postos de honra”.
Sen embargo, a incorporación de dúas disciplinas máis (o salto con pértega e o triplo salto) ben podería dar como resultado que se mudase o escenario competitivo e dar lugar a sorpresas nos resultados desta Copa de Galicia de Clubs Máster en Pista Cuberta. Haberá que agardar ao domingo 12 para poder comprobar se esta modificación inflúe nas clasificacións de xeito notable. O que si constitúe e un paso máis cara a dotar de maior competitividade á categoría feminina. Preparar probas como o salto con pértega ou o triplo salto require de condicións e habilidades específicas nas atletas e tamén dotar aos clubs de corpos técnicos que conten con persoas especializadas en adestrar estas probas.
