En menos de 24 horas a Copa Galicia de Ciclocrós viviu as súas dúas primeiras xornadas. Se o sábado polo serán e en horario nocturno o certame autonómico abriu temporada en Betanzos, o domingo pola mañá e a primeira hora da tarde celebrouse o segundo asalto do calendario en Ferrol. Só seis dos catorce ciclistas que venceron o día anterior repetiron triunfo no VI Ciclocróss Val de Esmelle.
O sábado 22 tivo lugar o CX Concello de Betanzos organizado polo Caimanes de Betanzos. E o domingo 23 celebrouse o VI Ciclocross Val de Esmelle organizado polo Esmelle Club.
A chuvia intermitente foi endurecendo co paso da carreiras o circuíto deseñado polo Club Esmelle, un trazado xa de por si esixente e no que resultou difícil non cometer erros ao estar esvaradío. O evento catalogado de clase 1.33.5 pola Real Federación Española de Ciclismo (RFEC), ao igual que o resto de citas da Copa Galicia CX, comezou coa carreira de promoción Infantil e continuou coas dos masters masculinas. Os corredores chegados dende Portugal anotáronse tres dos catro triunfos por medio do máster-30 Augusto Midao, do máster-40 Rogerio Matos e do máster-50 Antonio Sousa. A vitoria autonómica asinouna Antonio González (Salvaterra) nos máster-60.
A competición cadete masculina, con Néstor Frías (Avanza-O Porriño) cruzando a liña de meta en primeira posición, deu paso ás dúas mangas principais. En Ferrol deixou de chover antes do inicio de dúas probas nas que competiron un total de nove categorías.
O Supermercados Froiz dominou na carreira feminina e sumou dous triunfos. A júnior Aroa Otero abriu oco na primeira volta, consolidándose en cabeza mentres a súa compañeira de equipo Uxía Soto íase ao chan sen consecuencias. Porén, o contratempo que marcaría o desenlace sufriríao a porriñesa. Unha avaría mecánica de Aroa Otero permitiu á ponteareá Uxía Soto adiantala no treito final. A 50” das dúas xuvenís completou a tripla da formación alimenticia a gañadora Sub-23 Laura Mira.
O resto das clasificacións femininas tiveron como primeiras clasificadas a Lorena Patiño (XSM) nas cadetes, a Eva Ortega (Extol) nas elites, a Iria Nieto (Compostelano) nas máster-30 e a Marina González (Illas Cíes) nas máster-40.
Os dous ciclistas que a noite anterior se xogaron a vitoria ao esprint en Betanzos comezaron levando a batuta en Ferrol. O elite Samuel González (Máis Que Bicis) e o Sub-23 Ricardo Buba (Drone Hopper-Gsport) íanse de inicio e por detrás establecíanse outras dúas parellas, a de Anxo Carril (Coruxo) e Saúl López (Academia Postal-Maceda) aos que perseguían Rubén Deaño (Ourense Termal) e David Fernández (Avanza-O Porriño).
Nesta ocasión, Ricardo Buba non resistiu o ritmo de Samuel González e o vigués puxo terra de por medio. A súa vantaxe aumentou paulatinamente ata selar o seu segundo triunfo consecutivo por 1 minuto e 19 segundos de vantaxe sobre o tamén elite Saúl López, que co paso das voltas foi a máis e rematou a proba 1’12” antes de que o fixera o representante do Drone Hopper-Gsport, primeiro Sub-23. As outras dúas prazas do top-5 absoluto corresponderon ao sub23 Anxo Carril, cuarto, e ao elite Rubén Deaño. Entre os juniors estreou a súa conta de vitorias Martín Díaz (Caimanes Betanzos), segundo informa a Federación Ciclismo Galego.
Despois do intenso arranque da Copa Galicia, as quince camisolas de líderes pertencen a Raúl Puelles (Caimanes Betanzos) e Lorena Patiño en cadetes, Sarela Conde (Academia Postal-Maceda) e Martín Díaz en juniors, Zaira Vila (Coruxo) e Ricardo Buba en Sub-23, Eva Ortega e Samuel González en elites, Iria Nieto e Augusto Midao en máster-30, Paula Blanco (Monte Xalo) e Rogerio Matos en máster-40, Isabel Castro (Condado Bike) e Antonio Sousa en máster-50 e Antonio González nos máster-60.
A vindeira fin de semana o certame coordinado pola Federación Ciclismo Galego, que esta campaña consta de trece eventos, seguirá na provincia da Coruña e terá como única xornada a do sábado en Santiago de Compostela.
Próximas carreiras da Copa Galicia Ciclocross 2022-23:
- 29/10/22 – XXI Trofeo de Ciclocross Cidade de Santiago.
- 01/11/22 – XIII Ciclocross Concello de Cambre
