- O XXIV edición do Trofeo Montes de Eiras tivo en Sarela Conde como a ciclista máis forte, a deportista vencía por terceira vez no que vai de tempada a proba Elite-Sub23-Júnior
A Copa Galicia de Ciclocrós viviu unha experiencia diferente esta fin de semana na súa quinta cita da temporada. Na XXIV edición do Trofeo Montes de Eiras, o Club Ciclista Rosal estreou un novo circuíto que percorre os viñedos da adega Terras Gauda. Un escenario nunca visto na nosa comunidade e no que o Academia Postal-Maceda foi o equipo que se apuntou unha mellor colleita de triunfos, segundo informa a Federación Ciclismo Galego.
A solleira xornada no Baixo Miño subiu o pano co corte de cinta no que participaron Antón Fonseca, vicepresidente executivo de Terras Gauda; Germán Fernández, concelleiro de Deportes do Rosal; José Ramón Lete, Secretario Xeral para o Deporte da Xunta de Galicia; David Carrillo, presidente da Xunta Xestora da Federación Ciclismo Galego; Alberto Sobrino (presidente) e José Carlos Fernández (directivo) do Club Ciclista O Rosal; e Ángel Madrazo, corredor profesional de estrada e convidado de luxo a este evento.
Sarela Conde vence con 36″ de marxe
A proba raíña feminina Elite-Sub23-Júnior tivo por terceira vez no que vai desta temporada a Sarela Conde como a ciclista máis forte. A xuvenil do Maceda impúxose por 36″ de marxe respecto á vencedora entre as elites María Jesús Barros (Team Oiense Women), quen bateu por 5″ á líder elite Eva Ortega (Extol). A xuvenil Xiana Camiña (Avanza-O Porriño) e a elite Rebeca Fontela (Máis Que Bicis), cuarta e quinta respectivamente, completaron os cinco primeiro postos e Sonia Domínguez (Team Farto), oitava, cruzou a liña de meta como primeira sub23.
O chanzo máis alto do podio no Rosal tamén o pisaron como gañadoras e gañadores das súas categorías Uxía Bautista (Avanza-O Porriño) e Samuel Castiello (Unicaja) en cadetes; Miguel Porto (Ponteareas) nos máster-30; Montse González (Illas Cíes) e Andrés Calvete (Monte Xalo) en máster-40; María del Carmen Armada (Farto) e Antonio Sousa en máster-50; e Manuel González Ojea (Bici O Con) nos máster-60.
O ciclista cántabro do Burgos BH formou parte do pelotón Elite-Sub23 que rodou entre viñedos, unha carreira dominada por partida dobre polo Academia Postal-Maceda. O monfortino Saúl López abriu a súa conta de vitorias desta campaña na Copa Galicia de Ciclocrós ao superar por 18″ ao seu compañeiro de equipo Iván Feijoo. A terceira posición, a 1 minuto e 10 segundos do gañador absoluto, correspondeu a Anxo Carril (Coruxo), o primeiro sub23. Cuarto finalizou o elite Xavier Meizoso (Narón) e o top-5 pechouno Samuel González (Máis Que Bicis), líder elite da Copa. Na mesma quenda, André Martínez (Avanza-O Porriño) triunfou entre os juniors.
Ver esta publicación en Instagram
A vindeira xornada da Copa Galicia disputarase o sabado que vén en Barbadás e a terras ourensás chegará portando as camisolas de líderes Lorena Patiño (XSM) e Raúl Puelles (Avanza-O Porriño) en cadetes, Sarela Conde e André Martínez en juniors, Zaira Vila (Coruxo) e Anxo Carril en sub23, Eva Ortega e Samuel González en elites, Iria Nieto (Compostelano) e Miguel Porto en máster-30, Paula Blanco (Monte Xalo) e Constantino Muñoz (Grupeta Pan de Zarko) en máster-40, María del Carmen Armada e Antonio Sousa en máster-50, e Manuel Dorrio (Cambre) nos máster-60.