Non foron doce, senón trece as badaladas que no 2022 compuxeron o calendario da Copa Galicia de Ciclocrós e a última deuse este sábado de Noitevella no Concello de Culleredo.
O Trofeo A Laboral baixou o pano do certame autonómico, que chegou a súa clausura coa maioría das súas quince clasificacións xerais por categorías decididas matematicamente. O líder elite Samuel González (Máis Que Bicis) puxo a guinda ao seu título cun triunfo na proba raíña masculina e a Sub-23 Laura Mira (Supermercados Froiz) impúxose na feminina.
Nun dos escenarios máis emblemáticos do ciclocrós galego, a Peña Ciclista Monte Xalo encargouse de que todo fora sobre rodas no fin de festa da Copa Galicia de Ciclocrós. A chuvia non fixo acto de presenza nun trazado con treitos enlamados, pero o vento si que se quixo sumar a este despedida. Soprou con forza, pero non coa suficiente como para frear ao gran dominador na quenda Elite-Sub23 desta temporada. O vigués Samuel González colleitou en Culleredo o seu sexto triunfo parcial.
Vestido coa camisola de líder, o elite do Máis Que Bicis venceu con 1 minuto e 13 segundos de vantaxe respecto ao sub23 Ricardo Buba (Gsport), que tamén triunfou por partida dobre, no seu grupo de idade e na xeral. O terceiro posto, a 2’17” do gañador, correspondeu ao elite Saúl López (Academia Postal-Maceda) e as outras dúas prazas do top-5 ocupáronas os elites Xavier Meizoso (Narón) e Manuel Ángel Parada (Xesteiras), cuarto e quinto respectivamente. Nesta mesma quenda o portugués Tomás Gaspar (Peñafiel) superou por 6” ao líder júnior André Martínez (Avanza-O Porriño) na pugna polo triunfo entre os xuvenís.
Vitoria de Laura Mira en Culleredo
A emoción tamén se mantivo ata o final na carreira Elite-Sub23-Júnior feminina. A porriñesa Laura Mira, tras estrear a súa conta de vitorias a xornada anterior en Ponteareas, bateu no trazado da Laboral por 13” a outra sub23, a Sofía Álvarez (Cambre-Caeiro).
Coa terceira posición e co triunfo júnior fíxose Marta Estévez (Supermercados Froiz), que cruzou a liña de meta a pouco máis de 1’ da súa compañeira de equipo. A líder elite María Jesús Barros (Team Oiense) rematou cuarta unha proba que non disputou Eva Ortega (Extol), a única corredora que lle podía arrebatar o maillot da Copa, e quinta clasificouse Rebeca Fontela (Máis Que Bicis), ocupando o segundo chanzo no podio elite.
No resto de categorías só se podía dar un cambio de líder na máster-40 masculina. Andrés Calvete, que gozaba dun cómodo colchón de 110 puntos de diferenza, non fallou exercendo de anfitrión. O representante do Monte Xalo sentenciou o ranking apuntándose o triunfo nun vibrante duelo resolto por 11” de diferenza con Constantino Muñoz (Grupeta Pan de Zarko), a súa única ameaza na xeral. O club organizador colleitou outra vitoria nas máster-40 coa tamén líder da súa categoría Paula Blanco.
A nómina de gañadoras e gañadores da xornada en Culleredo completárona Alejandra Neira (Cambre-Caeiro) e Adrián García (Compostelano) en cadetes, Iria Nieto (Compostelano) e Miguel Porto (Ponteareas) en máster-30, Marcial Rodríguez (QueBici-Marcisport) nos máster-50 e Tucho González (Salvaterra) nos máster-60.
íderes finais
Os resultados da décimo terceira e última xornada non provocaron ningún variación no máis alto das clasificacións xerais e, polo tanto, os quince líderes finais por categorías foron Iris Fernández (Academia Postal-Maceda) e Xián Alvariño (Ponteareas) en cadetes, Sarela Conde (Academia Postal-Maceda) e André Martínez en juniors, Zaira Vila (Coruxo) e Ricardo Buba en Sub-23, María Jesús Barros e Samuel González en elites, Iria Nieto e Miguel Porto en máster-30, Paula Blanco e Andrés Calvete en máster-40, Isabel Castro (Condado Bike) e o portugués Antonio Ferreira en máster-50 e Tucho González nos máster-60.
Cerimonia de clausura da Copa Galicia ciclocrós
A entrega de premios do Trofeo A Laboral incluíu a cerimonia de clausura da Copa Galicia de Ciclocrós, un acto no que participaron como autoridades Miguel Suárez, concelleiro de Deportes do Concello de Culleredo; Julio Brandariz, presidente da Peña Ciclista Monte Xalo; Juan Carlos Muñiz, presidente da Federación Ciclismo Galego (FCG); e David Carrillo, secretario da FCG. A temporada de ciclocrós autonómico pecharase o vindeiro domingo coa súa cita máis agardada: o Campionato de Galicia en Poio.
