Hoxe sábado 6 de maio terá lugar a I Copa Galega Xunta de Galicia e o II Open Cidade de Santiago de Marcha Nórdica, dúas probas organizadas pola sección de Marcha Nórdica do Club Vía Láctea en colaboración do Concello de Santiago, e a Federación Galega de Montañismo. Será un evento benéfico xa que se destinará unha parte do importe da inscripción á Cruz Vermella, segundo informa o Concello de Compostela.
A I Copa Galega Xunta de Galicia e o II Open Cidade de Santiago de Marcha Nórdica, contará conxuntamente coa participación de 162 persoas inscritas, procedentes de varias Comunidades Autónomas. As dúas probas celebraranse na Alameda de Santiago a partir das 17:00 h. Previamente, levarase a cabo unha andaina semiurbana de 11:00 a 12:00 h na propia Alameda e a presentación da modalidade de marcha nórdica, Nordic Power, na libraría AENEA.
Tres mulleres xestoras na presentación
A concelleira de Deportes do Concello de Santiago, Esther Pedrosa; a presidenta da Federación Galega de Montañismo, Josefina Maestú; e a representante do Club Vía Láctea, Mª José Rodríguez Otero, presentaron este dobre evento deportivo de marcha nórdica nunha rolda de prensa no Pazo de Raxoi. Tres mulleres xestoras deportivas protagonizaron polo tanto esta presentación.
O circuíto, que percorrerá o “paseo da Ferradura” da Alameda compostelá, ten unha distancia de 2,44 kms. A proba da Copa Galega finalizará cando o marchador/a complete as 5 voltas deste percorrido, facendo un total de 12,2 kms. Pola súa parte, os participantes do Open Cidade de Santiago só darán 3 voltas, completando unha distancia de 7,3 kms pasando igualmente por meta en cada volta. O tempo máximo para completar o circuíto será de 2 horas 30 minutos.
A organización non cortará en ningún momento o tránsito dos paseantes da Alameda
As categorías Masculino e Feminino cubre: categoría Absoluta (maiores de 16 anos), sub-categoría Junior (16 a 17 anos), sub-categoría promesa (18 a 23 anos), sub-categoría sénior (24 a 39 anos), sub-categoría veterana A (de 40 a 49 anos), sub-categoría veterana B (de 50 a 59 anos), sub-categoría veterana C (de 60 a 69 anos), sub categoría veterana D (a partir dos 70 anos).
O mesmo que o ano anterior, o evento está dedicado á Cruz Vermella, convertendo así a este evento nun acto benéfico. Pola súa gran labor na protección da vida humana, da súa saúde e garantindo o respecto e protección a todas as persoas sen ningún tipo de discriminación.
Deste xeito, unha parte do importe da inscrición estará destinado a este organismo, que tamén estará presente aportando voluntarios e unha ambulancia, así como levando a cabo a venda dos seus boletos do sorteo do Ouro, a sua maior fonte de ingresos.
Promoción da Marcha Nórdica
Este campionato pretende dar visibilidade a un deporte emerxente como é a Marcha Nórdica con bastóns, que ademáis de ter múltiples beneficios para a saúde, pódese practicar a calquera idade, en distintas intensidades e sen requerir ningún tipo de condición física.
Ademáis tamén se quere cubrir a necesidade que teñen os marchadores/as profesionais galegos/as para poder competir na nosa comunidade e non ter que desprazarse a outras comunidades, o cal ten un coste añadido que non todos poden asumir. A motivación a entrenar nesta modalidade deportiva é maior conseguindo cada vez máis marchadores/as galegos.
Horarios da I Copa Galega e no I Open Cidade de Santiago de Marcha Nórdica:
Os horarios da xornada son os seguintes:
- 11:00 – 11:30 h BRIEFING presencial na librería AENEA de Santiago, que tamén será retransmitido por streaming.
- 12:00 – 13:30 h Recollida de dorsais. no mesmo parque da Alameda.
- 11:00 – 12:30 h Andaina semiurbana de Marcha Nórdica.
- 12:30 – 13:30 h Presentación do NORDIC POWER.
- 17:00 h Saída da I Copa Galega Xunta de Galicia + II Open Cidade de Santiago.
- 20:00 Entrega de trofeos.
- 21:00 h Cea de confraternidade.
