Aragón repetiu este domingo como escenario da Copa de España de Pump Track na súa terceira xornada. A pista zaragozana de Ejea de los Caballeros recolleu o testemuño da turolense de Aínsa e de novo, tal e como acontecera a principios deste mes, a representación galega acumulou un importante botín de vitorias e outras posicións de podio. Ademais, cinco riders da nosa comunidades lideran as súas categorías e lucirán as camisolas amarelas do certame estatal o 11 de xullo na localidade lucense de Xove, a sede da seguinte proba puntuable.
Sergio Veiga (Pontebike) e Paula Rodríguez (Val do Ulló) comandaron a actuación do Pump Track de Galicia na provincia de Zaragoza. Ambos asinaron os terceiros postos nas táboas scratch.
O piloto do Pontebike exerceu de líder anotándose o triunfo sub-23 cunha marca de 15″810, un rexistro que unicamente rebaixaron o júnior rioxano Álex Toledo (Sendero), con 15″540, e o cadete aragonés Ángel Esteban (BMX School), o máis rápido da xornada grazas a un tempo de 15″480. Raúl Gándara (Pontebike), segundo nos sub-23, acadou a sexta praza absoluta e Sergio Hidalgo (Pontebike), terceiro nos júniores, tamén se meteu no top-10 como noveno clasificado.
Liderado na Copa de España de Pump Track infantil para Paula Rodríguez
A vitoria entre as cadetes de Paula Rodríguez permitiulle asaltar o liderado da súa categoría. O seu ‘crono’ de 17″860 só o bateron a infantil manchega Aiby Hiniesto (BMX El Casar), que fixo 17″720, e a sub-23 aragonesa Ruth Abad (BMX School), que se apuntou o scratch feminino con 17″230.
Outras tres galegas aparecen entre as dez mellores clasificadas absolutas: sexta Carla Pérez (Val do Ulló), terceira nas cadetes; oitava Candela Rodríguez (Val do Ulló), segunda nas infantís e líder; e novena Daniela Vilas (Farto), cuarta nas cadetes.
A elite Rosi Martínez (Val do Ulló) e Mateo Rial (Bentraces), nos promesas 7-8, reforzaron a súa condición de líderes e elevaron a catro o número de triunfos galegos en Ejea de los Caballeros, onde tamén subiron ao podio Evaristo Fernández (OsDoSacho), terceiro elite; Carlos Núñez (Kamikazes), segundo máster-30; Diego Vilas (Farto), segundo máster-40; Sofía Núñez (Ribadumia), segunda alevín; Eva Vilas (Farto), terceira alevín; e Sofía Casal (Val do Ulló), segunda promesa 7-8. En total, o Pump Track da nosa comunidade pisou catorce veces o caixón.
Este sábado actívase no calendario desta especialidade a Copa Galicia co Gran Premio Concello de Miño, primeiro dos cinco eventos puntuables para o certame autonómico desta campaña.
