Os equipos de fútbol sala galegos que seguen na competición pola Copa da Raíña xa coñecen os seguintes cruces do torneo. Os oitavos de final, que se celebrarán os días 4 e 8 de xaneiro, enfrontarán ao Poio Pescamar FS co Ourense Envialia e ao ENCE Marín Futsal co Pescados Rubén Burela.
En cada un dos duelos galegos haberá un finalista da edición anterior da Copa. O pasado 20 de decembro, Málaga acolleu o partido final no que o Burela revalidaba o seu título de campión ante o Poio, que obrigou ás vixentes campioas a loitar polo trofeo ata o final.
O Burela revalida o título de campión da Copa da Raíña de Fútbol Sala
O Grupo B da Copa enfronta aos equipos galegos entre si
O rival do Burela para esta fase da edición 2020/2021 será o ENCE Marín. As xogadoras lograron impoñerse en dezaseisavos de final ao Viaxes Amerelle, un equipo superior en categoría pero ao que igualaron sobre o terreo de xogo.
Cun 3-3 no marcador, foi necesaria unha tanda de penaltis para decidir que conxunto pasaría de fase. O cadro herculino fallou na lotería dos penaltis e finalmente o pase foi para o equipo de Marín.
En oitavos terán todo un reto por diante. Enfróntanse ao Burela, campión das dúas últimas edicións e tamén gañador do título de Liga da última tempada disputada. Un palmarés que o convirte en anfitrión da Supercopa de España, que celebrarase o 9 de xaneiro en Vista Alegre entre as Guerreiras Laranxas e o Poio.
O ENCE Marín Futsal segue vivo na Copa ao eliminar na quenda de penalties ao Amarelle
O outro partido do grupo B, no que se encadran os conxuntos galegos, será entre o Poio e o Envialia.
Na rolda anterior, o Ourense Envialia logrou impoñerse ao Cidade das Burgas, nunha nova edición do derbi ourensán, despois de disputar o equivalente ligueiro uns días atrás.
Se o duelo de Liga estivo disputado, o de Copa foi dominado completamente polas laranxas dirixidas por Morenín. Cun par de goles tempraneiros, obra de Marta, o Envialia logrou iniciar unha goleada ao Cidade.
Cun 0-5 no descanso, o partido xa estaba sentenciado, pero o marcador non parou aí. Na segunda parte, as de Codeso lograron asinar dous tantos, pero ante a pegada laranxa foron insuficientes para a remontada. O resultado final foi dun abultado 2-9 para as de Morenín.
Agora, para o encontro de oitavos de final da Copa da Raíña, o Ourense Envialia terá ante si un oso duro de roer. Enfrontaranse a un Poio Pescamar que está en racha na Liga e que ostenta a vitola de ser vixente subcampión do torneo. De feito as de Poio disputará por esta posición a seguinte Supercopa de España, xustamente contra o Pescados Rubén Burela. Outro título estatal que quedará en Galicia, si ou si.
Na Liga, Ourense Envialia e Poio Pescamar xa se viron as caras. O cruce tivo lugar hai menos dun mes, a principios de decembro no Paco Paz de Ourense. O resultado foi de 1-5 para as futbolistas do conxunto de Poio. Pero as ourensás están en liña ascendente no seu xogo e son cada vez máis regulares, polo que é posible que neste cruce de Copa, as forzas estean un chisco máis igualadas. Todo está por decidir, nada está escrito e os favoritos sobre o papel perden igual que calquera outro conxunto.
Na Copa da Raíña do pasado curso, que aínda se decidiu hai poucas semanas (estaba pendente de disputa a fase final por mor da pandemia de COVID-19), lograron impoñerse ao Universidad de Alicante na última semifinal e puxéronlle as cousas moi difíciles ás Guerreiras Laranxas na loita polo título. As xogadoras do Pescados Rubén Burela só puideron gañar dun gol, que deixou ao Poio Pescamar ás portas de acadar o seu primeiro título copeiro, e permitiu ás de Burela revalidar o entorchado.
