“A Copa 5×5 Deputación da Coruña – Balonmán na rúa” levará o balonmán ás rúas de sete localidades da provincia. En concreto aos concellos de: Carballo, Cerceda, Ferrol, Muros, Arzúa, Ribeira e Camariñas. Trátase dun proxecto dirixido a nenas e nenos de 6 a 11 anos, que se achegarán ao balonmán dunha forma
lúdica e deportiva.
No acto de presentación da Copa 5×5 na sede da Deputación Provincial da Coruña participaron a deputada provincial de Deportes, Cristina Capelán, e o presidente da Federación Galega de Balonmán, Bruno López Molina.
Cristina Capelán destacou o atractivo desta proposta que, ademais de promocionar os concellos con esta orixinal competición, “saca o balonmán dos pavillóns para que poida ser desfrutado polo público na rúa”.
🏆 A Copa 5×5 @Depucoruna leva o balonmán ás rúas de sete concellos da provincia.
📍 #Carballo será esta fin de semana a primeira sede deste novo torneo, que se disputará tamén en #Cerceda, #Ferrol, #Muros, #Arzúa, #Ribeira e #Camariñas.
ℹ https://t.co/WdtbvISkuC pic.twitter.com/xAd8nOstVc
— Deputación da Coruña (@Depucoruna) January 31, 2023
Referiuse a deputada provincial de deportes na presentación da cita “ao importante papel da Federación Galega de Balonmán e a súa aposta de chegar a máis concellos nos que aínda non hai escolas ou clubs estables mediante iniciativas como esta, que permiten unha maior visibilidade a este deporte, achegando o balonmán a todos eses nenos e nenas que non o practicaron nunca e que ademais crean sinerxias entre o deporte e o tecido local”.
Pola súa banda, Bruno López, agradeceu a aposta da Deputación da Coruña por un proxecto “novidoso e valente, que nos permite darlle visibilidade ao noso deporte escapando dos pavillóns e montando unha gran festa lúdica e deportiva en lugares emblemáticos de sete localidades da provincia”.
Sete localidades da provincia da Coruña na Copa 5×5
O máximo responsable da Federación Galega de Balonmán referiuse á primeira proba da Copa 5×5 Deputación da Coruña, que se vai disputar esta fin de semana en Carballo, na que contan co apoio do Concello, dos centros escolares e do club Xiria: “Vai ser unha proba de fogo nun pobo que vive o balonmán con paixón”.
“A Copa 5×5 Deputación da Coruña – Balonmán na rúa” contará cun total de sete sedes. Na última delas, o Concello de Camariñas, celebrarase a final na que participará os seis equipos campións da probas anteriores.
O torneo comezará esta fin de semana (do 3 ao 5 de febreiro de 2023) na Praza do Concello de Carballo, e posteriormente desprazarase ao Concello de Cerceda (10-12 de febreiro), Ferrol (24-26 de febreiro), Muros (10-12 de marzo), Arzúa (24-26 de marzo) e Ribeira (14-16 de abril).
Nos lugares elixidos para a disputa desta competición popular disporase unha pista de mini-balonmán ao aire libre, con bancadas para que as familias poidan gozar vendo en acción aos máis pequenos/as. Os equipos participantes deberán ter un mínimo de 5
integrantes ademais dun/ha responsable (de máis de 16 anos).
Inscrición de balde e agasallos
Segundo informa a Federación Galega de Balonmán, a inscrición nesta “A Copa 5×5 Deputación da Coruña – Balonmán na rúa” é gratuíta e a FG Balonmán está a contactar cos centros escolares das diferentes localidades, co obxectivo de impartir sesións de promoción deste deporte de equipo, nas que xa se introducirán unhas nocións básicas para xogar un partido desta modalidade.
Está previsto que todas as persoas participantes nesta edición da “A Copa 5×5 Deputación da Coruña – Balonmán na rúa” reciban unha equipación conmemorativa da cita deportiva. Ademáis, no caso dos dous primeiros equipos clasificados de cada proba en cada categoría recibirán un trofeo e medallas para todos os integrantes do conxunto.
