A boa campaña que realizou o equipo feminino do Club Waterpolo Pontevedra non pasou desapercibida para os responsables técnicos da Real Federación Española de Natación. Proba diso é a cita ao técnico, Kike García, para participar como adestrador convidado co combinado estatal xuvenil.
Logo de ter acadado o obxectivo principal da tempada no mes de febreiro, e meterse de maneira sorprendente na loita por subir a División de Honra, o equipo feminino do Club Waterpolo Pontevedra continúa a recibir recoñecementos ao traballo realizado. Un exemplo foi o convite ao stage de seleccións internacionais en Portugal. Agora súmaselle a chamada da RFEN ao técnico Kike García.
O adestrador do Club Waterpolo Pontevedra foi chamado para participar como adestrador convidado dentro do combinado estatal xuvenil masculino, onde coincidirá co grupo estatal feminino da mesma categoría, así como as novidades de BeachPolo.
O adestrador do equipo feminino galego participará no CAR de Santi Cugat do 10 ao 16 de xullo nestes adestramentos, nos que poderá renovar conceptos para afrontar a próxima campaña no club pontevedrés con máis preparación.
O Club Waterpolo Pontevedra é o máximo representante do waterpolo feminino galego, milita na Primera División Nacional.
