O sábado (25 de xaneiro) ás 19.00 horas no Polideportivo Lasesarre enfrontarase o Conservas Orbe Porriño e Zubileta Evolution BM Zuazo. Este encontro corresponde coa xornada once e concretamente, co fin da primeira volta da Liga Guerreras Iberdrola.
O partido non será nada doado. Ambos conxuntos atópanse en condicións moi similares a par que complicadas. O Zubileta Evolution Zuazo está situado no posto once e xunto por riba está o Conservas Orbe, os dous equipos están a cinco puntos.
“É un partido trascendental para nós, que afrontamos como é pola situación de ambos equipos na táboa. O Zuazo é un equipo moi bo coas internacionais absolutas como Amaia e Ainhoa Hernández, que foi unha das mellores pivot do Mundial de Xapón. E teñen dúas internacionais xuvenís como June e Madi que son dúas xogadoras de moito nivel. Alba Sánchez tamén está facendo unha tempada moi boa”, comentou Isma Martínez, o adestrador do Porriño para As Nosas.
Despois de perder na xornada anterior no duelo galego ante o Mecalia Atlético Guardés, o equipo porriñense afronta este partido coa necesidade de conseguir os puntos para saír da zona de descenso. Tamén conta coa derrota na Copa da Raíña onde as xogadoras non estiveron moi regulares.
Para esta cita contan coa baixa de Nagore por un problema nas cervicais e de Sandra Fernández por un viaxe de estudios. Erika Tabales segue por longa duración. Pero, a capitá Sarai Sanmartín viaxará co equipo.
En canto o equipo local, Martínez dixo: “Teñen a mesma situación ca nos. Están competindo e facendo as cousas ben pero non se reflexa en puntos”. As de O Porriño teñen que ter presentes que para elas o partido é moito máis trascendente. “O final recibiron na casa a todos os equipos que están por baixo na clasificación e se somos capaces de puntuar alí sería un pase moi bo para nós, subíndonos moito a moral” .
DATOS DE INTERESE
DÍA E HORA: 25 de xaneiro, ás 19.00 horas.
CAMPO: Polideportivo Lasesarre – Barakaldo (Vizcaia).
ÁRBITROS: Pedro Cubas Martínez e Gabriel López Martos.
INCIDENCIAS: Partido correspondente a xornada 11 da Liga Guerreras no que enfrontará ao Zubileta Evolution BM. Zuazo contra o Conservas Orbe BM Porriño no Polideportivo Lasesarre.
