A Media Maratón Coruña 21 (C21), que percorrerá a cidade herculina o 16 de febreiro a partir das 10.00 horas, con saída do Obelisco, ten como data máxima de inscrición o domingo 9 de febreiro. Son xa máis de 1.700 persoas as inscritas nesta cita nas súas diferentes categorías: Máster, Senior, Sub 23 e Sub 20.
XII Media Maratón Coruña21 conta cunha distancia homologada de 21.097,50 metros. A proba, incluída no calendario oficial das competicións da FGA e a RFEA, disputarase a través dun circuíto totalmente urbano.
Esta cita competitiva atlética ten prevista a súa hora de comezo ás ás 10:00 horas do domingo 16 de febreiro. No que atinxe aos nomes propios das/os deportistas que teñen confirmada a súa presencia, a Media Maratón Coruña 21 contará co cartel de importantes atletas africanos entre os que se atopan Edwin Kipruto (1h.02), Vestus Cheboi (1h.03), Hosea Kiplimo (1h.03), Samir Ait (1h.03), Bekele Jima (1h.03) DedaraAduguma (1h.17) e Abebaw Bayeh ( 1h.04) Mónica Gutiérrez (1h.10) e Adawork Aberta (1h.09).
A inscrición a través da pasarela de pago inserida na web www.carreirasgalegas.com poderá realizarse ata o domingo 9 de febreiro. Previamente houbo un período de inscrición a custo reducido de 15€ pero agora xa se deben aboar 25€, pero existen bonificacións para diferentes colectivos. Na web referida figuran os detalles sobre prezos e bonificacións, modo de inscrición e regulamento da proba, no que se da conta de cuestións como recorrido (pódese consultar o detalle do recorrido e do perfil da proba nesta ligazón), entrega de dorsais, servizos, etc.
Precisamente nese capítulo de servizos, nas bases anúnciase a “habilitación de aseos portátiles localizados na zona de saída e na zona do Porto de Oza e Paseo Marítimo do trazado de Coruña 21“. Así como duchas, “dispoñibles na Cidade Deportiva de Riazor en horario de 11:00 a 14:00 horas”. E tamén servizo de roupeiro que estará “dispoñible nunha carpa situada na zona próxima á saída, no Obelisco, desde as 08:30 ata as 09:30 horas e desde as 11:15 ata as 13:00 horas do día da carreira”.
Premios en metálico da C21
Están previstos premios en metálico para as primeiras persoas clasificadas, ademais de para as máis rápidas entre as de nacionalidade española, para as galegas e coruñesas (deberá acreditarse documentalmente).
Asimismo, a/o atleta que gañe a carreira e que bata o récord da proba tanto na categoría masculina (1 h 02’57’’) como na feminina (1 h 11’ 16’’) obterá un premio de 1.000 euros.
Estos premios, que poden consultarse no regulamento da proba, non son acumulables. Segundo explica ese regulamento: “os premios en metálico non serán acumulativos, con excepción do récord da proba. No caso de duplicidade, aboarase a contía máis alta. Para poder recoller os premios, será necesario xustificar documentalmente o ano de nacemento das persoas participantes por medio do DNI as españolas, ou do documento legal en vigor (pasaporte) as estranxeiras. Todos os premios estarán suxeitos ás retencións legais vixentes”.
Á procura dunha C21 máis sustentable
A C21 está organizada pola Federación Galega de Atletismo e o Concello da Coruña. Nesta edición, presenta a súa cara máis ecolóxica e sustentable. As/os deportistas lucirán dorsais elaborados con papel reciclado e nas zonas de avituallamento utilizaranse bolsas biodegradables,
Ademais, todas/os os atletas que cheguen á meta recibirán unha medalla finisher de madeira. A organización tamén designará xuízas e xuíces específicos que velarán pola xestión correcta dos residuos por parte das persoas participantes e realizarán enquisas para coñecer o medio de transporte que utilizaron para desprazarse á carreira.
O Concello da Coruña acolle diferentes carreiras populares ao longo do ano. É o caso de a C10, C21, C42 e Coruña Corre.
A cita foi presentada hai xa uns días. O acto contou coa presenza da alcaldesa, Inés Rey, o concelleiro de Deportes, Juan Ignacio Borrego, o presidente da Federación Galega de Atletismo, Isidoro Hornillos, o delegado da Federación Galega na Coruña, Diego Paz, así como representantes de Coca Cola e El Corte Inglés, patrocinadores da proba.
