- Rematou o parón de Nadal e o Conservas Orbe Rubensa BM Porriño viaxa ás illas Canarias a medir forzas co Rocasa Gran Canaria. As galegas son cuartas con 14 puntos e as grancanarias son segundas con 16. O partido é un cruce importante para a zona alta da Liga Guerreras Iberdrola.
Hoxe, sábado, 14 de xaneiro, ás 18:30 horas (hora insular) no Pavillón Insular Antonio Moreno de Telde enfrontaranse o Rocasa Gran Canaria, BM Remudas, e o Conservas Orbe Rubensa Bm Porriño. O encontro corresponde coa undécima xornada da liga Guerreras Iberdrola.
En canto ao rival, o Rocasa Gran Canaria non tivo un parón de semanas como as galegas. O seu último partido do 2022 foi o día 28 de decembro. Aquel día as canarias enfrontáronse na décima xornada ao Super Amara Bera Bera onde que as donostiarras consolidaron a primeira posición, antes das vacacións do Nadal, cun resultado de 30-22. O equipo de Telde inicia este novo ano en segunda posición cun total de dezaseis puntos.
Pola súa banda, o Conservas Orbe Rubensa Bm Porriño xogaron o seu último partido o 21 de decembro, tamén contra o equipo dirixido por Imanol Álvarez (o Super Amara Bera Bera), recuperando o partido aprazado da novena xornada da liga. O equipo vasco tamén sumou os dous puntos en terras galegas cun resultado de 29-36. O conxunto porriñés está colocado en cuarto lugar da clasificación con catorce puntos.
O conxunto que prepara Robert Cuesta aférranse á súa condición de invictas en casa para sumar un novo triunfo co que pechar unha notable primeira volta e manter a persecución ao Super Amara Bera Bera, que se atopa a tan só un triunfo de distancia. Na cabeza das isleñas toca seguir sumando e logo esperar un fallo das vascas para recuperar o liderado. O plan B é agardar ao próximo cara a cara con elas para asaltar o primeiro lugar da táboa na Liga Guerreras Iberdrola.
O técnico das grancanarias non ten baixas para recibir ao equipo galego. A única ausencia, tal e como lembran na súa web as teldenses, é a da “xogadora sueca Sabina Jakobsen, que finalizou o seu contrato tras un acordo co club o pasado mes de decembro”.
“Rocasa ten un dos tres mellores bloques de xogadoras da Liga”, di Isma Martínez
Ismael Martínez, técnico do equipo galego do Conservas Orbe Rubensa Bm Porriño, resaltaba na previa do partido coas canarias calidade do bloque de xogadoras co que conta o Rocasa Gran Canaria.
Na opinión do adestrador do BM Porriño o conxunto isleño ten a deportistas dun gran nivel na liga Guerreras Iberdrola. “Falar de Rocasa é falar dun equipo que ten un dos tres mellores bloques de xogadoras da liga, sen ningunha dúbida. Fisicamente son moi fortes e teñen unha capacidade de lanzamento exterior moi superior ao resto de conxuntos”, explicaba Ismael Martínez.
Á hora de analizar a parte máis técnica explicaba a necesidade de concentración e traballo que esixen este tipo de encontros “vai esixir unha concentración absoluta á hora de defender e á hora de dar profundidade ao noso sistema. Imos ter que ser máis equipo, xogar máis colectivo”. Tamén destacaba posicións como os seus pivotes que “teñen moitísimo nivel dentro da liga” ou as súas primeiras liñas con xogadoras de alto nivel como Almudena Rodríguez ou Marta Mangué.
O adestrador do BM Porriño, Isma Martínez, ten os pés no chan pero é ambicioso: “Temos moitas ganas de pechar a primeira volta tentando sumar os 16 puntos, algo que sería histórico e colocaríanos moi alto na clasificación. Ilusiónanos moito ter esa opción, a pesar de saber que é unha das canchas máis difíciles da liga e que vai ser complicado”
O equipo do Porriño afronta este primeiro partido do ano, e que supón o peche da primeira volta, con moita ilusión. “Temos moitas ganas de pechar a primeira volta tentando sumar os 16 puntos, algo que sería histórico e colocaríanos moi alto na clasificación. Ilusiónanos moito ter esa opción, a pesar de saber que é unha das canchas máis difíciles da liga e que vai ser complicado. Esperamos poñerlle un broche a esta primeira volta impresionante”, anticipaba o adestrador do Conservas Orbe Rubensa Bm Porriño, Ismael Martínez.
O encontro será dirixido pola parella de colexiados andaluces Roberto Carlos Mendoza e Juan Pablo Visciarelli e poderá seguirse ao vivo en liña a través do streaming de Canarias Deporte.
