Non vai ser algo novo. Esta tempada, o Conservas Orbe Porriño enfrontouse en dúas ocasións ao rival que recibe este venres (o 7 de febreiro, ás 21.00 horas) no Pavillón Municipal de Porriño. O Liberbank Gijón saiu vitorioso tanto no partido da xornada 2 da Liga Guerreras Iberdrola coma no da segunda fase da Copa da Raíña.
“Son moi coñecidas para nós. Este ano en dúas ocasións atopámonos con elas. Será un partido que non nos vai a exixir tanto de preparación do rival porque as coñecemos moito e sabemos perfectamente como xogan”, comenta para As Nosas, o adestrador do conxunto porriñense, Isma Martínez.
O Liberbank Gijón está situado no segundo posto da Liga Guerreras Iberdrola. Levan dúas vitorias nos últimos dous partidos ante o Alcobendas e o Salud de Tenerife. “Gañaron con apuros a Alcobendas e en Xixón ante o Salud comenzaron bastante frouxas perdendo cun electrónico moi chamativo”. Isma Martínez pensa que é un equipo “moi estable no rendemento” e ten un plantel “moi amplio”.
As de Porriño, para esta cita, chegan non momento moi bo. A semana pasada, acadaron a vitoria ante Helvetia BM Alcobendas por un 21 a 22 no marcador. “É unha vitoria que necesitábamos gañar así cun resultado moi apertado. As xogadoras chegan con moito ánimo e esperamos que sexa un punto de inflexión para seguir sumando e sobre todo agora na casa a pesar de que sexa un rival da parte alta son partidos que temos que sacar adiante” apunta sobre as súas, Martínez.
Na táboa xeral están décimas pero empatadas a puntos —concretamente con sete— con Zuazo. As vascas viaxan a Valencia para enfrontarse ao Club Balonmano Elche. Pero as nosas xogadoras e o seu adestrador no se fixarán na cuantía deste encontro. “Queremos seguir sumando os nosos puntos, o de superalas non nos preocupa tanto a corto prazo. Non sei se Zuazo será capaz de gañar en Elche pero non é moi desatinado”.
Isma Martínez (Porriño): “Esta será a nosa oportunidade de demostrar o que somos ante Xixón”
Dous enfrontamentos, dúas derrotas. A primeira no partido de ida da Liga e o segundo, fai nada, na Copa da Raíña. Pero esta vez, reciben o Liberbank na casa. “O factor cancha ten que ser fundamental” di o técnico do conxunto galego.
Só xogaron cinco partidos na casa. “Tres deles foron contra os favoritos o título o Atlético Guardés —no duelo galego— o Bera Bera e o Rocasa. Nós temos que sacar puntos contra elas porque primeiro temos unha conta pendente moi grande do partido de Copa que non estábamos en condicións de competilo e en Liga foron moito mellores e entón temos unha espiña moi grande con eles”.
Na xornada 2, na comunidade veciña, as porriñenses perderon por once tantos de diferenza (36-25). Na Raíña, tan só rebaixaron en un cun 20 a 30 que marcaba o electrónico final. “No partido da xornada 2, foron moitísimo mellores infinitamente durante todo o partido e non é real esa diferenza entre equipos e a verdade que temos moitísimo por demostrar. É a nosa oportunidade porque nos somos un equipo que tras ese partido fixemos un pouco de piña no vestiario e concienciámonos a que tíñamos que reconducir a situación“.
Para esta nova cita, o adestrador só ten indisposta a Anthia. “Non sabemos como estará de cara o partido pero o resto a verdade que mellorando e sacando a xente da enfermería. Nagore non puido xorgar nos últimos partido pero xa está traballando moito mellor co grupo”.
DATOS DE INTERESE
DÍA E HORA: 7 de febreiro, ás 21.00 horas.
CAMPO: Pavillón municipal de Porriño – O Porriño.
ÁRBITROS: Pedro Eiras Abalde e Lucas Crespo Gómez.
INCIDENCIAS: Partido correspondente a xornada 13 da Liga Guerreras Iberdrola no que enfrontará ao Conservas Orbe BM Porriño e o Liberbank Gijón no Pavillón Municipal de Porriño.
