“Mañá será un día importante para o deporte coruñés, agardamos que o consello se converta nunha ferramenta para establecer as bases do noso deporte de aquí en diante”, sinalou a alcaldesa da cidade da Coruña, Inés Rey, referíndose ao novo Consello Municipal do Deporte da Cidade da Coruña (CMD), que mañá, martes 6 de abril, se constituirá por primeira vez na historia.
O Pazo dos Deportes de Riazor acollerá a sesión constitutiva do Consello Municipal do Deporte da Cidade da Coruña, un órgano consultivo e de participación do mundo do deporte herculino. Inés Rey lembrou que, desde o inicio da súa lexislatura, “a creación deste consello foi para nós unha prioridade” e considerou “imprescindible” a constitución deste instrumento que potenciará a promoción do deporte e a actividade física na cidade.
O novo consello estará integrado por representantes da decena de entidades sociais ou de carácter asistencial que teñen por obxecto primordial a práctica continuada dunha ou varias modalidades deportivas dentro dos seus programas de terapia, fomento da vida saudable, inclusión, normalización social e igualdade.
Inés Rey, alcaldesa da Coruña: “Agardamos que o consello se converta nunha ferramenta para establecer as bases do noso deporte de aquí en diante. A creación deste consello foi para nós unha prioridade”
Ademais, formarán parte persoas representantes de organismos e institucións públicas, da Unión de Federacións Deportivas Galegas, da Federación das ANPA da cidade e do Colexio Oficial de Licenciados en Educación Física de Galicia.
O órgano tamén contará cos grupos municipais do Pleno do Concello da Coruña, estará presidido pola alcaldesa da cidade, Inés Rey, e vicepresidido por Mónica Martínez, edil de Deportes.
Mónica Martínez apuntou que “a partir de mañá porase a funcionar a maquinaria coa seguridade de que entre todas e todos podemos construír o que realmente necesitamos: un espazo para debater, estudar, propoñer e traballar para mellorar”. A concelleira indicou que “o Consello Municipal de Deportes será o que queira que sexa o deporte coruñés” porque, asegurou, “será o deporte herculino o que marque as liñas de traballo”.
Tras a constitución formal do Pleno do CMD, informarase as persoas presentes do período electoral que se abrirá inmediatamente despois para que se presenten candidaturas a vogais da comisión permanente do consello.
Un Consello Municipal do Deporte diverso e representativo
Segundo o previsto polo artigo 20 das Normas de Funcionamento do Consello, serán elixidos/as nunha futura sesión do Pleno ata un máximo de 10 vogais. Polo menos seis destes/as vogais deberán ter a condición de representantes dos clubs deportivos da cidade. “É imprescindible que cada un/unha deses/as vogais elixidos/as de entre as entidades represente unha disciplina deportiva distinta”, indicou a titular de Deportes. Deste xeito, búscase acadar a máxima representatividade das 93 entidades deportivas que, debidamente inscritas no Rexistro Municipal de Asociacións Coruñesas (REMAC), aceptaron a invitación da alcaldesa para formar parte deste consello.
Está previsto que o Consello Municipal de Deportes da cidade da Coruña (CMD) teña un Pleno anual, aínda que este ano haberá dous ao considerarse o acto de mañá, martes 6 de abril, o primeiro. Con posterioridade traballarase cunha comisión permanente da que sairán grupos de traballo que se espera que lle proporán diferentes temas á Concellería de Deportes.
Ao acto institucional de mañá, martes 6 de abril, que terá lugar na dependencia municipal do Pazo dos Deportes de Riazor, asistirán unhas 120 persoas. Está estipulado un procedemento para que se cumplan todas as medidas sanitarias e de seguridade, seguindo os protocolos existentes.
