O 2021 acaba de comezar, e con el as primeiras actividades de A.D. Judo Ferrolterra. Este ano o club celebrou, como é tradición no mundo das artes marciais e particularmente do Judo, un adestramento de 10 días chamado Kangeiko.
Explican desde a A.D. Judo Ferrolterra que “este tipo de preparación é un adestramento que tradicionalmente se realiza a temperaturas baixas, nos días e horas mais frías do inverno, e que leva celebrándose desde a fundación de Kodokan, a organización e escola de Judo creada polo mestre-fundador Jigoro Kano en 1882.
O obxectivo deste adestramento é “cultivar, sobre todo entre os mozos, unha serie de valores como a forza de vontade ou a perseveranza, e non só o físico”, indican desde a A.D. Judo Ferrolterra.
Alba e Hugo, o 8 día de Kangeiko
Por primeira vez para este club, segun informa a entidade, “os judokas de A.D. Judo Ferrolterra reuníronse nas instalacións que o club ten en Espazo Deportivo Ferrolterra en Narón do 1 ao 10 de Xaneiro, todas a mañás de 6:30 a 8:30, para realizar un adestramento tradicional, onde se completaron sesións de uchikomi (repeticións dunha técnica, ben en estático ou en movemento) e randori (práctica libre, en simulación de combate), cumprindo en todo momento coas medidas de seguridade dispostas na normativa actual da Federación Galega de Judo e D.A. para a prevención do COVID“.
“Cun total de 15 judokas que participaron en polo menos unha sesión, só 8 completaron 9 ou máis das 10 sesións, conseguindo desta maneira certificar a súa participación no Kangeiko 2021.
Entre eles, cabe destacar a presenza de dous mozos judokas, Alba Bolo e Hugo López, de 8 e 9 anos respectivamente, que a pesar da súa idade participaron nesta actividade, mostrando unha gran forza de vontade, interese e paixón polo noso deporte”, relatan desde a A.D. Judo Ferrolterra.
