En 1996, o Club Atletismo Sada nacía da man de Isidoro Hornillos, actual presidente da Federación Galega de Atletismo. Tras anos dun lento crecemento e unha coordinación amadora, un cambio completo directiva reconduce o camiño desta organización. Fernando Míguez toma as rendas e xunto co resto do equipo de mando comeza a apostar por realizar atletismo na rúa e fomentar a participación en carreiras populares.
Persoas en idades máster empezaron a gozar deste deporte e foron apuntando aos seus fillos e fillas nas categorías inferiores. A medida que máis nenos e nenas se apuntaban, durante as mañás de competicións, os proxenitores que estaban no club aproveitaban para adestrar, mentres que os que non estaban nas bancadas. Estes fóronse unindo ás prácticas, o cal fixo medrar considerablemente a masa social do club, que conta xa con 1.500 socios e 400 licencias de competición divididas en catro seccións: atletismo, tríatlon, montaña e atletismo adaptado.
Así o narran dous dos membros o equipo directivo actual: Pilar Barreiro, atleta máster, e Adrián Pérez, director técnico. A pesar de levar respectivamente catro anos e un ano en Sada, coñecen perfectamente a historia de como este pequeno e mozo club de atletismo coruñés acadou o número de participantes que ten actualmente.
Un ano particular motivou unha nova reestruturación do Club Atletismo Sada
Pilar Barreiro comenta que en 2020, aproveitando o ano de transición provocado pola chegada da COVID-19, desde a directiva aproveitouse para facer unha reorganización e reestruturación, xa que debido ao tamaño ao que se estaba chegando, era inabarcable para as dez persoas (tres mulleres e sete homes) que a conformaban. E así foi como chegou ata teras sadense o actual director técnico.
“O punto clave é a conciliación. O resto de clubs non a teñen, en cambio nos a promovemos”, comenta Pilar Barreiro sobre un dos aspectos principais da organización actual do club.
“O punto clave é a conciliación. O resto de clubs non a teñen, en cambio nos a promovemos”, salienta a directiva e corredora Pilar Barreiro
“Agora mesmo temos dous horarios diferentes: de 18.00 a 19.15 e de 19.30 a 21.00 horas. Os pais adestran na rúa mentres os nenos están na pista, unha vez acaban, vanse todos xuntos para casa”, engade Adrián Pérez a esta cuestión, á que remarca Pilar Barreiro que “ti podes levar ao teu fillo a outras actividades e como moito ti saes a facer outra cousa. Pero aquí o bo é a parte social, que os pais e nais despois nos reunimos. De feito eu empecei así, hai catro anos, como ‘mamá de’”.
A conciliación tamén se promove para os e as atletas adolescentes
Desde o ano pasado o Club Atletismo Sada ten en marcha o programa SENECAS, dirixido por Iaione Domínguez, no que a atleta de marcha apoia aos e ás adolescentes a organizar e planificar os seus estudos xunto co seus adestramentos. En todo momento hai unha comunicación cos seus pais e nais para que coñezan como evoluciona o seu fillo ou filla. “Un dos principais problemas que detectamos foi que moitos mozos e mozas deixaban o atletismo polos estudos. Grazas a esta iniciativa poden combinar ambas facetas da súa vida”, destaca Pilar Barreiro.
Pola súa banda, Adrián Pérez tamén resalta que “agora tamén lles buscamos clubs onde adestrar se marchan a vivir ou estudar lonxe de Sada. Así lles é máis doado continuar coa práctica deste deporte e seguen pertencendo ao CAS”.
Velocistas, lanzadoras… así son as atletas con máis proxección do CAS
En canto ao tema máis estritamente deportivo, das catro seccións, a máis grande é a de atletismo propiamente, que conta con máis de 300 licencias de competición. Pilar Barreiro e Adrián Pérez coinciden ao nomear as atletas máis destacadas nas categorías inferiores do CAS.
No campionato de Galicia sub23 celebrado o ano pasado na pista cuberta de Ourense, María Ezquerro acadou a medalla de prata en lanzamento de peso. Ademais, ao campionato de España sub18 de xullo deste ano acudiron Eva Santos, en lanzamento de martelo, e Inés Vázquez, para os 400 metros lisos.
Pero a sección máis laureada é a máster, onde compiten persoas de máis de 35 anos, o cal se puido comprobar no Campionato de España celebrado en Ourense o último fin de semana de novembro. O Club Atletismo Sada foi o que máis atletas enviou á proba, cun total de 29, e foi o segundo máis metais acadou, con 22, só por detrás do Playas de Castellón.
Un evento no que participou a propia Pilar Barreiro, quen conseguiu o bronce no 400 metros lisos, así como o ouro e o récord de Galicia no 4 x 200 Mixto 50 xunto con Jacinto, Montse e Fernando, o presidente. “O bo que temos nesta directiva é que tamén competimos, practicamos co exemplo e padecemos xunto co resto dos atletas do club”, comentaba entre risas.
Ademais tamén contan con outras tres seccións. “A de tríatlon, da que se encarga o vicepresidente Carlos Reinlein, encóntrase agora mesmo nun momento de transición debido á falta de infraestruturas para adestrar na que nos atopamos actualmente”, lamenta o director técnico, Adrián Pérez.
Aínda así, destaca que os que aínda permanece na sección continúan acudindo a competicións, como é o caso de Andrea Rodríguez, que participou no mundial de duatlón celebrado en Avilés a principios de novembro.
Felipe López é a persoa encarga da sección de montaña, onde destacana Covadonga Gallego, que acadou o terceiro posto na categoría máster no último campionato de España celebrado en 2019 e Cristina Yudego, que chegou a participar na competición a nivel galego.
No Club Atletismo Sada hai posibilidade de practicar deporte adaptado
Todas as persoas deportistas teñen sitio no Club Atletismo Sada. Xa falamos desa conciliación entre proxenitoras/es e fillas/os, de que contan con equipo máster, pero ademais, á procura constituir un espazo deportivo para todas as persoas, no CAS teñen tamén sección de deporte adaptado, na que se atopan persoas con diversidade funcional. Estas deportistas compiten dentro de cada unha das outras tres seccións.
Unha das atletas máis destacadas é Carmen América, da que xa temos falado previamente en As Nosas. quen participou na última CAMOVI xunto con Felipe López, que é o seu guía.
Tamén Ana Varela Mosteiro, quen chegou a ser internacional co seu guía, Luis Pinado. Ademais, ao longo de todas as categorías e modalidades se atopan persoas con diversidade funcional destrando e competindo en eventos a nivel autonómico.
Carmen América: o soño dunha atleta cega que prepara a maratón da CAMOVI 2023
