O pasado venres tivo lugar senllas reunións das Xuntas de primeira e segunda división da Asociación de Clubs do Fútbol Femino, coa participación de 13 e 25 clubs respectivamente, o que supón 38 dos 48 clubs participantes na Primeira Iberdrola e da Liga Reto Iberdrola. Este luns reunirase a Xunta de terceira división, que agrupa aos clubs da ACFF que participan na Primeira Nacional, terceira máxima competición nacional.
Nestas reunións debateuse a intención por parte da RFEF de dar por finalizadas todas as competicións non profesionais de ámbito estatal, entre as que se inclúen as competicións de fútbol feminino. Desde a ACFF reiteran a importancia de que a RFEF conte coa participación e opinión da ACFF e os seus clubs á hora de tomar decisións que puidesen afectar os campionatos de fútbol feminino, como é o caso actual.
A Asociación manifestase plenamente consciente da gravidade da situación á que nos estamos enfrontando como sociedade. Así, obviamente, calquera escenario ou hipótese que puidese implicar a continuación das competicións entendena sempre baixo unhas premisas de estrito cumprimento e aprobación dos organismos sanitarios competentes, e sempre contando coas máis absolutas garantías que permitan preservar a saúde de todos os que forman parte da competición
A ACFF engade no seu comunicado que “de igual forma, e semente baixo as premisas anteriores, resulta fundamental protexer a integridade das competicións, así como os valores do deporte. Por iso, é desexo dos clubs, sempre que se contase con todas as garantías, poder acabar a tempada”.
Análise individual que permita adoptar as medidas axustadas a cada caso
Así mesmo, os clubs da ACFF entenden que non se pode aplicar unha solución ou resposta homoxénea a todas as competicións. Cada competición ten unhas particularidades moi específicas, e o impacto de calquera decisión pode chegar a ser moi diferente atendendo ás circunstancias. Por iso, desde a Asociación de Clubs do Fútbol Feminino avogan por realizar unha análise individual que permita adoptar as medidas axustadas a cada caso, e que poden chegar a non ser as mesmas para todas as competicións non profesionais.
Así, os 13 clubs de Primeira Iberdrola, de forma unánime, entenden que resulta precipitado tomar a decisión de dar por finalizada a competición neste momento. O impacto tanto económico como sobre a integridade da competición sería tan importante que deberían apurarse ao máximo as opcións e prazos antes de adoptar unha decisión tan importante.
Esta foi tamén a postura maioritaria dos membros da Xunta de Segunda División, os clubs que participan en Reto Iberdrola. A pesar de que as circunstancias que se dan nesta competición e nos seus clubs son diferentes á Primeira Iberdrola, a maioría dos clubs entenden que debe esperarse un pouco máis antes de tomar a decisión de finalizar esta competición.
Marco de diálogo entre RFEF e Asociación
Por último, desde os clubs entenden fundamental establecer un marco de diálogo e colaboración entre a RFEF, a ACFF e o resto dos clubs participantes nas competicións para ir analizando durante as próximas semanas a evolución da situación e as circunstancias e implicacións para cada unha das categorías para tomar as decisións pertinentes chegado o momento.
