- A capital galega acollerá do 12 ao 14 de xuño o Campionato de España de Baloncesto 3×3 de clubs U17, que reunirá a 80 equipos chegados de toda España de categorías feminina e masculina.
Santiago de Compostela confírmase como sede oficial do Campionato de España de Baloncesto 3×3 de clubs en categoría U17 masculina e feminina, que se disputará do 12 ao 14 de xuño deste 2026.
Galicia acollerá polo tanto a cuarta edición do Campionato de España de Baloncesto 3×3 de clubs en categoría U17 masculina e feminina. A competición celebrarase no pavillón municipal de Santa Isabel, recentemente reformado, e reunirá 80 equipos, 40 femininos e 40 masculinos.
A concelleira de Deportes da capital galega, Pilar Lueiro, celebrou que Santiago sexa a sede oficial deste relevante evento deportivo, un dos máis importantes do calendario federativo, e valorou que congregará previsiblemente máis de 1.000 persoas entre deportistas, equipos técnicos e público durante os tres días de competición.
“Santiago consolídase como capital do deporte”, aplaudiu Pilar Lueiro, e reafirmou o compromiso do Concello de Santiago de Compostela co baloncesto.
Hai pouco, a responsable municipal de Deportes visitou as instalacións de Santa Isabel, onde se disputarán os partidos, acompañada do presidente da Federación Galega de Baloncesto, Julio Bernárdez, quen agradeceu ao Concello de Santiago a súa colaboración e compromiso para lograr que a cidade albergue esta cita deportiva estatal.
Epicentro do baloncesto 3×3 U17
Galicia sitúase de novo como o epicentro do baloncesto 3×3 a nivel estatal coa celebración dunha das citas máis importantes do calendario federativo.
O Campionato contará coa participación de 80 equipos, 40 masculinos e 40 femininos; e prevese que congregue a máis de 1.000 persoas entre deportistas, equipos técnicos e público. Unha cita deportiva desta magnitude supón ademais un impacto económico significativo para a cidade e a súa contorna.
Nas próximas semanas iranse comunicando todos os detalles relativos ao campionato: escenarios de xogo, horarios e actividades complementarias que acompañen á competición, segundo informan desde a Federación Galega de Baloncesto (FEGABA).
A Federación Galega de Baloncesto (FEGABA) quixo “trasladar o seu agradecemento ao Concello de Santiago de Compostela, cuxa colaboración e compromiso foron determinantes para que a cidade poida albergar esta cita estatal”.
