Mañá, sábado 20 de marzo, a cidade de Santiago de Compostela acollerá a celebración do Campionato Galego Infantil da tempada 2020 – 2021. Esta cita contará coa participación de deportistas das categorías benxamín (ata 7 anos), alevín (8 e 9 anos), infantil (10 e 11 anos) e xuvenil (12 e 13 anos).
A competición, de carácter clasificatorio para o Campionato de España destas categorías, terá lugar no Pavillón Municipal de Santa Isabel (Compostela).
Este campionato autonómico de karate vaise celebrar en xornadas de mañá e tarde, que darán comezo ás 10:30 horas e 16:00 horas, respectivamente.
Sen público nas bancadas en Compostela
Debido á situación sanitaria que se vive en Galicia por mor da pandemia de COVID-19, nesta ocasión non se permitirá o acceso de público para poder ver a competición de karate desde as bancadas do Pavillón Municipal de Santa Isabel, pero poderase seguir en directo a través da canle de You Tube da Federación Galega de Karate.
Contará coa participación de 133 deportistas pertencentes a 19 clubs federados. Os clubs composteláns inscritos son o Ávalon-Kai e o Bushi-Kai, con 22 e 3 deportistas respectivamente. As modalidades de competición serán Kata (técnica) e Kumite (combate).
