A Liga Nacional de atletismo está de volta. Despois dunha emocionante fin de semana de campionatos galegos, os equipos de Galicia están listos para a competición estatal. Catro clubs en total serán os representantes da terra irmandiña nas máximas categorías estatais.
Na División de Honra, o Ría Ferrol será o club feminino galego na competición. O sábado, 24 de abril, dará comezo o Campionato Liga Iberdrola, no encontro D no que competirán contra o Grupompleo Pamplona, Super Amara BAT e o Atletismo San Sebastián. En categoría masculina participará o Sociedad Gimnástica de Pontevedra. Na pasada tempada, as ferrolás lograban rematar a última fase de permanencia cun segundo posto.
En Primeira División, o Sociedad Gimnástica estará presente cun grupo feminino, acompañado polo Atletismo Femenino Celta. As dúas formacións debutarán este sábado 24 en Madrid, coas locais do Atletismo Alcorcón e as andaluzas do Bahía de Algeciras, O obxectivo deste curso será manter a catgoría e aspirar á fase de ascenso á máxima división. Na última edición, as viguesas xa tiveron esta oportunidade, quedando terceiras finalmente. Na competición masculina estará o Real Club Celta.
Así será o sistema de competición no atletismo estatal
Neste curso, a competición estatal dividirase en tres xornadas ao aire libre polas tardes. Segundo informa a Federación Galega, nas dúas primeiras, o 24 de abril e o 8 de maio, os equipos distribuiranse en catro encontros cuadrangulares a dous atletas por proba, clasificándose segundo os resultados destas dúas xornadas para a terceira en dous encontros octogonais (un deles polo título e outro pola permanencia) a un atleta por proba.
