En Ourense hai dous equipos na máxima categoría do fútbol sala feminino estatal. Un deles é o Cidade de As Burgas. O seu adestrador é Manolo Codeso que dirixe hai anos ás verdibrancas cun lema por bandeira “Seguimos ao noso”. O técnico resume nesa frase a idea do crecemento individual das xogadoras e colectivo do grupo sen que o contexto importe máis que a superación propia. No seu balance de ano fala dunha “tempada atípica”, imposible discrepar, xa que, dende logo, desde que a COVID-19 apareceu, todo muduo.
Balance deportivo do 2020: “Foi un ano duro”
Manolo Codeso, adestrador do Cidade de As Burgas, no seu balance de 2020 explica que o viviu como “unha tempada algo atípica. Creo que todos teremos unha resposta case parecida, un ano duro onde todos os equipos tiñamos unhas ilusións enormes por cumprir os nosos obxectivos”. O técnico lamenta que ao final “non se puidese acabar a tempada, e sendo positivos creo que a Federación fixo todo o posible para que ninguén saíse prexudicado”, considera o prepardor galego.
O mellor do 2020, “o crecemento das novas”, e o peor “verse encerradas”
Cando pensa no mellor do 2020, o entrenador do Cidade de As Burgas di que “sen dúbida foi ver como o equipo ía crecendo e as xogadoras máis novas cada día se sentían máis veteranas no equipo, estabamos a competir cada día mellor e estabamos en bo camiño”, rememora.
Ao pensar no peor do 2020, Manolo Codeso coloca nese lado negativo o feito de “vérmonos encerradas e sen poder facer o que máis nos gusta ou nos enche, que é competir e adestrar, pero no fondo, visto todo o que pasou, aínda podemos dicir que fomos uns afortunados, así que queixarse é faltar o respecto a moitos deportistas, sobre todo de base”, reflexiona desde Ourense
Que pide o equipo ao 2021?
Na lista de desexos de Manolo Codeso para 2021 mirando só o deportivo, “pediríalle que seguísemos nesta liña, confiar no noso traballo de base e poder cumprir o obxectivo da salvación. Outro obxectivo persoal é que as xogadoras máis novas, cada día teñan máis protagonismo no equipo e facer gozar cada sábado aos nosos afeccionados, que é o máis grande que temos no club”.