Ao fronte do banco do Cidade de As Burgas estará un ano máis Manolo Codeso. O técnico das ourensás afronta un novo curso na máxima categoría do fútbol Sala estatal con ilusión e ganas de que o bloque que levan anos conformando vaia gañando madurez e se consolide na elite do cinco contra cinco feminino español.
Este ano suma a tres mociñas de 15 anos. Di Codeso que teñen unha “calidade bárbara”. Haberá que prestar atención as evolucións sobre o parqué de estas futbolistas.
Será esta unha tempada na que a COVID-19 seguirá a marcar a competición. O adestrador do Cidade de As Burgas é consciente diso e advirte que en moitos clubs haberá que bregar cos illamentos de fútbolistas ao longo deste curso 2020-2021.
As Nosas: Como ves ao equipo tras o parón e tras tantos meses sen competir?
Manolo Codeso: Persoalmente xa tiña ganas de volver ao traballo diario e ver ao meu equipo, aínda que con moitas dúbidas e con moita responsabilidade, volvemos e estou moi, moi sorprendido co nivel de adestramento, o equipo chega moito mellor de pensabámolos o corpo técnico.
Manolo Codeso, adestrador do Cidade de As Burgas: “Estou moi, moi sorprendido co nivel de adestramento, o equipo chega moito mellor de pensabámolos o corpo técnico”
As Nosas: Esta tempada 20/21 será, sen dúbida, atípica por todo o que rodea. Crees que pode ser unha oportunidade para que sexa unha Liga máis competida e apertada na que pode haber algunha sorpresa nos postos de arriba?
Manolo Codeso: Sen dúbida esta Liga será algo ou bastante diferente,estou totalmente seguro que moitos equipos xa nos primeiros meses xa non levaremos o mesmo número de partidos disputados, tamén vai influír, que oxalá non pase, algunha xogadora terá que gardar illamento en casa, e iso pode prexudicar moito a todos os clubs, a Liga como ben dis, pode estar máis parella en moitos postos.
Codeso: “Temos un gran plantel”
As Nosas: Cales son os obxectivos do Cidade de As Burgas para este curso?
Manolo Codeso: O obxectivo, é o de cada ano, pelexar con uñas e dentes por manter a categoría, e á vez crecer como grupo e que esta nova xeración se vaia formando ano tras ano.
Manolo Codeso, adestrador do Cidade de As Burgas: “O obxectivo, é o de cada ano, pelexar con uñas e dentes por manter a categoría, e á vez crecer como grupo e que esta nova xeración se vaia formando ano tras ano”.
As Nosas: A tempada pasada o equipo, a pesar de deixar grandes actuacións, non conseguía materializar os bos partidos en puntos. Crees que este ano será diferente xa que o equipo coñece mellor a competición e aos equipos?
Manolo Codeso: Confío plenamente neste grupo, o ano pasado xa tiñamos un gran bloque, se cadra algo curto para a esixencia desta categoría. Este ano coa incorporación das tres xogadoras do filial, Fara, Sol e África, tres xogadoras de 15 anos, que a pesar da súa mocidade, teñen unha calidade bárbara, creo que temos un gran plantel.
As Nosas: Comezades a tempada viaxando a Madrid, para xogar contra o Leganés. É a mellor maneira de empezar para poder medir o nivel e o estado do equipo nesta tempada?
Manolo Codeso: O que se temos ganas de empezar. Non é o mellor escenario, non polo rival, senón pola situación que se vive hoxe en día a Madrid, estamos con medo, respecto e iso espero non nos inflúa, iso si, teño claro que chegaremos con ilusión e preparadas para ir a polos tres puntos.
Manolo Codeso, adestrador do Cidade de As Burgas: “Coa viaxes a Madrid estamos con medo. Espero non nos inflúa”.