José Amado, presidente da Clúster Galego da Industria do Deporte e o Benestar, xunto a Sofía Toro, xerente da entidade, reuníronse con José Ramón Lete Lasa, secretario xeral para o Deporte co obxectivo poñer en marcha un plan de reactivación serio que sirva para aplacar os impactos derivados do COVID-19 e dos altos custos da enerxía.
Ambas as entidades coincidiron na importancia de apostar pola industria do deporte e José Amado mostrou a “total disposición do sector para traballar conxuntamente coa administración, pois entendemos que aumentar a porcentaxe de poboación activa é un reto importante para os próximos anos”, segundo informan desde o Clúster Galego da Industria do Deporte e o Benestar.
“A Secretaría Xeral para o Deporte comprometeuse a trazar un plan conxunto para, no último trimestre do ano, poñer en marcha unha campaña de promoción dotada de orzamento que sirva para atraer á sociedade cara ás empresas da industria do deporte”, indican desde o Clúster.
Incentivar á muller na práctica deportiva, un dos grupos de traballo de Clúster e Xunta
Con este obxectivo principal anuncian que se van crear catro grupos de traballo que comezarán a traballar a finais do mes de agosto para poder configurar un plan feito á medida da sociedade galega e ás súas necesidades.
Deste xeito inicialmente traballarase ao redor de catro liñas temáticas: promoción da actividade física, medidas para a incentivación da muller na práctica deportiva, medidas para a incentivación e inclusión as persoas con algunha diversidade funcional e dixitalización e formación.
