- A Aceleradora Galega do Deporte (Business Factory Sport), que impulsa o Cluster Galego da Industria do Deporte e o Benestar e o IGAPE será presentada oficiamente o vindeiro 30 de setembro en Compostela
- O acto contará tamén co Startup Day de Aceleración no que estarán as empresas que están a aplicar á primeira convocatoria do programa
A Cidade da Cultura de Galicia (Gaiás) acollerá o 30 de setembro a presentación oficial da Business Factory Sport, a aceleradora galega do deporte, impulsada pola Agrupación industrial Galega da Industria do Deporte e o Benestar e o Instituto Galego de Promoción Económica (IGAPE).
O acto contará cunha mesa redonda onde estará presente o ecosistema do deporte de Galicia e, entre os asistentes, haberá presenza das federacións galegas, empresas consolidadas da industria e startups. Tras a parte institucional, celebrarase o Startup Day de Aceleración que permitirá ás empresas que están a aplicar no programa mostrar o seu potencial #ante o xurado que decidirá que 6 proxectos entran no programa.
“A acollida nesta primeira edición está a ser espectacular”, destaca Sofía Toro, xerente da Agrupación industrial Galega da Industria do Deporte, quen convida ás startups da industria para inscribirse nesta primeira convocatoria de aceleración que está aberta ata o 19 de setembro.
Sofía Toro: “A acollida nesta primeira edición está a ser espectacular”
Este primeiro programa da aceleradora galega do deporte comezará o 6 de outubro e estenderase durante todo o trimestre. O itinerario de aceleración está deseñado para startups que xa teñen un produto mínimo viable e precisan validalo no mercado. De ser posible, desenvolverán unha proba de concepto nunha contorna real cunha das entidades tractoras dando resposta a un dos retos definidos no programa.
Entre as entidades tractoras da aceleradora galega do deporte están compañías como:
- Abanca
- Hijos de Rivera
- BeOne
- Jim Sports
- RC Celta
- RC Deportivo
As startups participantes contarán con sesións de ecosistema que se distribuirán entre masterclass con expertos; casos de éxito e estudo con entrevistas a emprendedores cos que poidan compartir experiencias; así como sesións con investidores que lles permitirán coñecer de preto que buscan os fondos de investimento.
Ademais, as 6 startups participantes realizarán un bootcamp intensivo a metade do programa no que se incluirán talleres formativos sobre os módulos do programa, así como visitas de interese a empresas do sector. Como gran aliciente, as empresas participantes, cuxa sede non necesariamente ten que estar en Galicia, poderán obter ata 25.000€ a fondo perdido por parte do IGAPE e tamén terán a posibilidade de investimento directo en capital de ata 50.000€ por parte de Xesgalicia.
Business Factory Sport, Aceleradora Galega do Deporte
O propósito da Business Factory Sport é axudar a emprendedores, startups e á industria do deporte en xeral a transformarse, a través da innovación aberta, segundo explican desde Agrupación industrial Galega da Industria do Deporte
O Clúster relata que esta iniciativa ofrecerá programas verticais de incubación, aceleración e consolidación durante o próximos tres anos, o que permitirá impulsar a máis de 50 startups do sector.
A mediados do mes de outubro abrirase o prazo de inscrición na primeira convocatoria de consolidación.
