- As dez persoas que conforman a nova directiva do Clúster do Deporte Galego, encabezada por José Amado como presidente, repasaron os fitos conseguidos desde a creación da entidade en marzo de 2021 e elaboraron unha folla de roteiro para seguir dando pasos na consolidación do proxecto.
- O sector do deporte supón máis do 2,5% do PIB de Galicia e que xera máis de 12.000 postos de traballo.
A xunta directiva do Clúster Galego da Industria do Deporte e o Benestar reuniuse recentemente co obxectivo de trazar os eixos fundamentais da folla de roteiro que marcará o camiño da lexislatura aberta o pasado mes de xuño.
Durante a reunión, o presidente José Amado detallou os obxectivos que se debe marcar esta nova directiva para os próximos meses, eixos estratéxicos cos que coincidiu o conxunto de membros, que ven a existencia do clúster como “unha gran oportunidade para que a industria do deporte teña a visibilidade e o peso que lle corresponde”.
A entidade, que xa conta con máis de 60 empresas asociadas, naceu en marzo de 2021, empuxada polas necesidades que ocasionou no sector a pandemia de COVID-19. Desde entón o crecemento foi sostido e, agora, coa incorporación de sete novos directivos, o principal obxectivo é consolidarse como agrupación empresarial e aumentar o seu grao de influencia como representante dun sector que actualmente supón máis do 2,5% do PIB de Galicia e que xera máis de 12.000 postos de traballo.
Tras o primeiro ano e medio de actividade, o Clúster Galego da Industria do Deporte e o Benestar conseguiu o recoñecemento por parte do IGAPE (Instituto Galego de Promoción Económica) como agrupación empresarial innovadora emerxente e xa comezou a crear unha estrutura profesional que traballa da man do sector.
A nova xunta directiva do Clúster xorde dun proceso electoral
Coa ampliación da xunta directiva, resultante do proceso electoral aberto o pasado mes de xuño, a folla de roteiro para o futuro máis inmediato trázase ao redor de catro eixos: capacidade de influencia e propositiva; visibilidade e prestixio, xeración de coñecemento e información.
Na reunión mantida nas instalacións do INEF de Coruña coincidiuse na importancia de converterse nunha entidade de prestixio que coñeza á perfección as necesidades de cada un dos subsectores que compoñen o sector, traballando nos ámbitos que sexan necesarios para defender os intereses do deporte galego.
Á procura de aumentar as empresas incorporadas ao Clúster
Outro dos obxectivos establecidos na reunión é seguir traballando para ampliar o conglomerado de empresas que conforman o Clúster Galego da Industria do Deporte e o Benestar, sabedores da importancia de que canto maior sexa a representatividade, maior será o impacto e peso da entidade. Así, a directiva coincidiu na relevancia de seguir xerando unha actividade interna e externa que lle dote de relevancia tanto dentro do sector como no conxunto da sociedade.
Sofía Toro é a xerente do Clúster Galego da Industria do Deporte e o Benestar
Durante o encontro tamén interveu a xerente da Clúster Galego da Industria do Deporte e o Benestar, Sofía Toro, que repasou os fitos conseguidos no último ano, así como fixo un repaso sobre o calendario de actividades realizadas e de eventos programados para os próximos meses.
A nova xunta directiva da Clúster Galego da Industria do Deporte e o Benestar está formada polos seguintes integrantes:
- José Amado (Motivos Singulares) – presidente.
- Pedro Iglesias (Salvar, Formar e Socorrer) – vicepresidente.
- Pablo Tenreiro (FCC Aqualia) – secretario.
- Jim Graña (Jim Sports) – vogal.
- Marcos Fernández (Gaia Xestión Deportiva) – vogal.
- Claudio Orjales (Espazos Termolúdicos) – vogal.
- Jacobo López (10 Mets) – vogal.
- Antonio Rodríguez do Corral (Cinfo Contidos Informativos Persoal) – vogal.
- Jose Manuel Regueiro (Run Maniak) – vogal.
- Fran Cortegoso (AQA Vigo Xestión Deportiva) – vogal.
