No Campionato Galego de Grapping feminino celebrado no Pavillón de Santa Isabel en Compostela resultou gañador o Club Sport Fight que atesorou 140 puntos.
O segundo lugar desta competición autonómica correspondeu ao Club Kempo Pobra con 75 puntos, e o terceiro lugar nos caixóns do podio foi para o Club Loita Kuzushi con 50 puntos.
No resto da clasificación figuraron o Club Iqfight, cuarto con 25 puntos, o Club Arte Suave España tamén con25 puntos e quinto, o Club Graíño da Coruña con 20 puntos que finalizou a competición en sétimo lugar, e finalmente, o Club Pretorians con 15 que foi oitavo.
Na xornada celebráronse competicións desde idades de base ata a categoría absoluta. Desde a Federación Galega de Loita (FEGALOITA) falan dunha “festa do deporte” e informan de que se contou cun récord de participación. “Ano tras ano o deporte medra e a mellor mostra é a ampla participación nesta competición autonómica”, aseguran desde FEGALOITA.
Desde a federación tamén lembra que as categorías U17 e U20, terán unha cita moi especial o vindeiro ano, coa celebración do mundial de Grappling de ambas categorías que se celebrará aquí, en Galicia.
“A promoción do deporte pasa tamén por achegar os grandes eventos a Galicia. Por ese motivo, moitos clubs amosan máis interese ante a posibilidade de participar en grandes citas mundiais”, explican desde FEGALOITA.
Club Sport Fight vence tamén no Campionato Galego de Grapping masculino
Na categoría masculina o Club Sport Fight tamén resultou gañador, neste caso con 315 puntos, seguido no podio polo Club Kempo Pobra (280 puntos) e o Club Graíño A Coruña (125 puntos).
A clasificación masculina do Campionato Galego de Grapping complétase co Club de Loita do Morrazo (90 ptos.), Club Pretorians (55 ptos.), Club de Loita Kuzushi (45 ptos.), Club Independiente (43 ptos.), Club Senin (33 ptos.), Club Camm (25 ptos.) Club Arte Suave España (25 ptos.) e, finalmente no undécimo lugar o Club Iqfight con 15 puntos.
