A xogadora do CRAT Residencia Rialta, Claudia Barrio, recibiu a chamada da Selección Absoluta de Seven. A rapaza, que chegou este ano ao club galego, está concentrada coas ‘Leonas’ en Valladolid.
Contan desde o equipo coruñes de rugby que a deportista “xa apuntaba maneiras nas categorías inferiores das ‘Leonas’, pero aínda así é sorprendente que o que na maioría de casos leva anos, Claudia Barrio conseguiuno por méritos propios mesmo antes de debutar na Liga Iberdrola, ser convocada pola selección española de rugby da modalidade olímpica, o Seven”.
A seleccionadora contou con ela para a concentración que se está levando a cabo na cidade de Valladolid e que concluirá o vindeiro martes 13 de outubro. Nela reúnese a que será previsiblemente a futura xeración de deportistas encargada de devolver ao rugby nacional a unhas olimpíadas.
Claudia Barrio, que chegou esta tempada ao CRAT procedente do Club de Rugby Rioxa, é unha das grandes promesas do rugby feminino español, e previsiblemente chegará a cotas aínda máis altas dentro do club, xa que, ademais de para xogar ao oval, tamén elixiu a nosa cidade para cursar os seus estudos.
