Mañá, sábado día 15 de xuño ás 18.00 horas, comeza a final de play-off polo título de Liga en Primera Federación do Futsalfem estatal. A competición determinou que a final sexa un enfrontamento que está considerado nesta disciplina no o clásico dos clásicos: Futsi Atlético Navalcarnero vs Pescados Rubén Burela FS. O escenario é o pavillón de La Estación de Navalcarnero.
Neste primeiro encontro as Guerreiras Laranxas do Pescados Rubén Burela terán que xogar en Madrid, ao contar o Futsi Atlético Navalcarnero co factor cancha. Nunha pista difícil na que as madrileñas dominan o terreo, as mariñás terano moi complicado para conseguir o primeiro punto para chegar con rede ao segundo partido, en Vista Alegre, na casa, onde sería ideal levar o cuarto título dos catro disputados esta tempada, o último, a Liga.
Ver esta publicación en Instagram
Despois dunha semifinal na que as burelenses gañaron os dous partidos ao Poio Pescamar, no Derbi das Costas, as galegas xogan sen o desgaste dese terceiro encontro de desempate. Non chegan con ese plus as futbolistas do Futsi Atlético Navalcarnero. Elas si que tiveron que chegar ao terceiro partido para eliminar ao Melilla Torreblanca (que adestra o galego Morenín) chegando á prórroga onde con dous goles consegue pasar á final.
Pase o que pase o clásico do futsalfem español promete ser un partido moi disputado e cheo de emoción. Dous grandes con moito en xogo e dispostos a levantar un trofeo que ambos os dous clubs teñen no seu palmarés en tempadas previas.
Jozi Oliveira: “Esta tempada os resultados estiveron por encima do esperado ao principio”
Para a segunda capitá do equipo, Jozi Oliveira, fixeron unha tempada mellor do esperado “A verdade é que foi un temporadón e creo que os resultados estiveron moi por encima do que esperabamos ao principio da tempada. É certo que do Burela sempre se espera que chegue e que dispute finais pero ao principio desta tempada houbo moitos cambios e éramos moi poucas en plantilla e a verdade é que superamos as espectativas”.
Ver esta publicación en Instagram
Sobre a motivación do equipo “Estamos moi motivadas para esta final, a cuarta de catro. Queremos pechar da mellor maneira e conseguir tamén este título de liga que sería poñer o broche de ouro á tempada espectacular que está facendo este equipo”.
Sobre o Futsi Atlético Navalcarnero, Jozi Oliveira explica: “A verdade é que nos coñecemos superben, a pesar de todas as baixas que ten o Futsi é un equipo moi competitivo e sabemos que teñen ese sangue de competición coma nós. Esperamos un partido especialmente disputado, será un rival difícil e con moita calidade, coma sempre”.
O adestrador do Pescados Rubén Burela, Julio Delgado, ve ao equipo galego fisicamente ben para esta final “Chegamos ben á final, demostrámolo o sábado contra o Poio nun partido supercompleto e estamos completando a semana de forma marabillosa, traballando pequenos detalles co obxectivo de chegar ben mental e fisicamente. Imos chegar ben o sábado”.
Ver esta publicación en Instagram
Delgado: “O futsi é un digno rival”
Sobre o Atlético Navalcarnero, Julio Delgado declaraba: “creo que foi o equipo máis regular e aí está na final dobregando a Melilla, é certo que lle custou e tivo que disputar o terceiro partido pero demostrou que segue sendo o referente, era un dos favoritos para disputar esta liga e ímolo ter na final, un digno rival”.
Sobre a presión do equipo ante a disputa do cuarto de catro títulos “a presión cada vez levámola mellor, demostrámolo estes últimos anos. Este equipo foi crecendo e madurando a medida que fomos chegado a finais e sobre todo gañando, gañando títulos. Temos enfronte un equipo que é tan veterano como nós e vai ser un rival que nolo vai poñer moi difícil, está afeito a xogar finais e a gañalas aínda que estes últimos añós caeu do noso lado. Desde logo creo que imos ver unha final moi igualada con dous equipos con moito carácter, con moito carisma e con moita veteranía e experiencia neste tipo de partidos”.
