Boa parte dos deportistas galegos de Taekwondo dánse cita esta fin de semana en terras ourensás e monfortinas. Na capital das Burgas celébrase o Open Cidade de Ourense de Combate e na capital da Terra de Lemos o Open Cidade de Monforte de Técnica e Freestyle.
A competición ourensá arranca o sábado 14 de decembro ás 9:00 horas no Pavillón Paco Paz co Open Cidade de Ourense RG3 puntuable para o ránking galego. Agárdase que no acontecemento participen máis de 300 persoas, entre deportistas e adestradores. Será a cita coa que se pechará o ano en competicións de combate en Galicia
O torneo está organizado polo centro deportivo Couto, en colaboración coa Federación Galega de Taekwondo, o Consello Municipal de Deportes de Ourense e a Deputación de Ourense.
Open Cidade de Monforte de Taekwondo
Con respecto ao Open Cidade de Monforte, a cita se vai celebrar a partir das 10:00 horas do domingo 15 de decembro nas modalidades de técnica e freestyle. Agárdase a participación duns 150 participantes.
Neste caso, a organización corre a cargo do Club Neka, en colaboración coa Federación Galega de Taekwondo e o Concello de Monforte. A competición comezará coa Técnica e a partir das 13:30 horas será a quenda do Freestyle.
