Cilene Pereira Paranhos renova o seu contrato e cumprirá a súa quinta tempada no Pescados Rubén Burela FS. A maxia da peche converterase nunha garantía máis reforzando o proxecto das Guerreiras Laranxas 2020-21.
A “6” burelista, que volverá a adestrarse esta semana co renovado equipo mariñán unha vez finalizado o confinamento domiciliario dende a súa chegada do Brasil , non agochou as súas ganas por volver sentir a emoción da competición, nunha tempada na que as actuais campioas de Supercopa, Copa e Liga volverán pelexar sen límites por novos éxitos para a familia laranxa.
“Estou preparada para todo, con moitas ganas de comezar, para poder gozar e facer gozar á xente tamén. O noso obxectivo é manter os títulos que gañamos a tempada pasada, traballar cada día para mellorar e seguir buscando evolución, aos poucos”, afirmou Cilene.
A internacional brasileira tamén afirmou que actualmente estamos a vivir un momento no as xogadoras que teñen que coidarse e pensar sobre todo na saúde, polo que este ano terán que acostumarse a xogar sen afección. “Pero sei que podemos sentir moi preto aos nosos afeccionados, aínda que esteamos lonxe. A nosa bancada sempre sabe como apoiarnos” sentenciaba a xogadora, coa mirada posta xa no mes de outubro para dar punto de partida á liga.
Cilene confirma a confianza no plantel do ano pasado
A brasileira reafirma o gran bloque de continuidade con Bea Mateos, Dany, Lara Balseiro, Ale de Paz, Jenny e Cristina, ademais de Jozi, Peque e Cami, e as chegadas da porteira Sandra Buzón, a universal Elena Aragón, a ala-peche Leti M. Cortés e a ala Cely. Así o Pescados Rubén Burela FS prepara a nova tempada con 14 xogadoras ás ordes de Julio Delgado e Lucas, ademais da meta de Comarcal A Fervenza FSF, Lucía Paz.
