A futbolista do Pescados Rubén Burela Cilene Paranhos sufriu unha lesión no partido de Supercopa ante o Poio Pescamar FS nun mal golpe dunha acción. Por iso, a xogadora brasileira tivo que ser intervida do tendón de Aquiles este martes.
Cilene comentou no seu perfil de Twitter que a ciruxía foi ben e que quere “agradecer a todos polas mensaxes positivas e as oracións. Espero recuperarme ben e o máis pronto posible estar de volta. Grazas a todos de corazón”.
Xa no anuncio da súa lesión, como agora tras a intervención, a 6 do Burela recibiu todo o apoio do mundo do futsal. Rivais de equipos como o Ourense Envialia e compatriotas de Brasil como Amandinha desexáronlle nas diferentes redes sociais unha pronta recuperación e moito ánimo.
Tamén o fixo a publicación Futsalplanet, encargada de outorgar os premios ás mellores xogadoras de futsal do mundo. Precisamente, o seu equipo, o Burela, e a súa capitá, Peque, están nominadas en distintas categorías da Annual Futsal Awards.
Get well soon craque! https://t.co/42GbMRoSYS
— Futsalplanet.com (@futsalplanet97) January 12, 2021
Desde o club laranxa tamén lle envían unha mensaxe de ánimo á sua guerreira número 6, recordando que “xa queda menos para volver gozar da Maxia” e sinalan que Cilene comezará o período de recuperación en Burela co corpo médico do equipo mariñán.