O Cidade de As Burgas intenta sobrepoñerse á ameaza de rematar a competición regular como colistas. As ourensás son as últimas clasificadas do seu grupo, pero teñen unha oportunidade de sumar tres puntos este sábado 20, ás 19:00 horas, xogando contra o Penya Esplugues.
As galegas chegan a este encontro cos ánimos baixos. A última semana chegou co ansiado derbi ourensán co Ourense Envialia, que comezaron gañando para acabar perdendo por unha goleada (7-1). O penalti de Fara, a goleadora das verdibrancas, e a súa expulsión marcaron o partido.
O Cidade mira a Cataluña
Agora as de Manolo Codeso deben deixar atrás este doloroso encontro para centrarse na súa visita ao Penya Esplugues. As catalás son sextas, con cinco puntos máis que as galegas, e aspiran a seguir sumando puntos antes do remate desta primeira fase.
Porén, o seguinte clasificado, o Leganés, quédalles xa a dez puntos, e o cuarto, que marca a diferencia entre os dous futuros grupos, está a 15 puntos.
Pola súa banda, o Cidade está a cinco puntos da zona de promoción no grupo conxunto, e deberá repoñerse da falta de intensidade que lle fixo caer no derbi. Para o partido ante o Penya, as de Codeso deberán deixalo todo na pista para depender de si mesmas para evitar o descenso directo.
