O Cidade de As Burgas non pode fallar. As ourensás son as penúltimas clasificadas no grupo polo descenso, e deben realizar un pleno de vitorias na segunda volta para asegurar a permanencia. O primeiro obstáculo a batir será o Universidad de Alicante, este sábado, 8 de maio, ás 16:30 horas.
O equipo de Manolo Codeso comeza a segunda metade da segunda fase co rival máis complicado do seu grupo. As alicantinas son un extraño no grupo pola permanencia. Tal é o seu nivel competitivo que foron capaces de chegar á semifinal da Copa da Raíña, onde caeron finalmente derrotadas ante o Torreblanca Melilla. Antes eliminaron ao AD Alcorcón no partido de cuartos.
No grupo D, o Universidad de Alicante é o primeiro clasificado, con 39 puntos e un coeficiente de 1,857, grazas a un balance de 12 vitorias, tres empates e só seis derrotas. Son ademais o terceiro equipo máis goleador do grupo, con 67 tantos a favor.
O Cidade de As Burgas aínda ten posibilidades de permanecer na Primeira División
Un escenario afastado da realidade do Cidade de As Burgas. As galegas están ao filo do descenso da Primeira División. Con 10 puntos e un coeficiente de 0,5, aínda teñen posibilidades de saír do pozo. O Teldeportivo empata coas ourensás e o Intersala Promesas acumula un 0,55. O Xaloc Alacant xa é equipo descendido.
Fóra das prazas do descenso directo están Penya Esplugues, con 0,9473 de coeficiente, Viaxes Amarelle, cun 0,95 e Rayo Majadahonda, cun punto de coeficiente. O duelo recuperado entre estes dous últimos equipos, con vitoria para as coruñesas, afecta negativamente ás ourensás.
Tres puntos de ouro para o Viaxes Amarelle ante o Rayo Majadahonda AFAR 4 FSF
