Volve a Primeira División de futsal, e o Cidade de As Burgas GLS quere empezar o 2021 tan ben como rematou o 2020. O primeiro reto: vencer ao AE Penya Esplugues na casa, este sábado, 16 de xaneiro, ás 17:00 horas.
Esta será unha oportunidade de ouro para as galegas. De gañar, e se o Amarelle perde ante o Envialia, o equipo ourensán podería saír dos postos de descenso.
As xogadoras ás ordes de Manolo Codeso despediron o ano pasado coa súa primeira vitoria, ante o CD Leganés FS por un traballado 6-2. Despois de sete partidos, as ourensás aínda non consegueran sumar os tres puntos, pero nas últimas xornadas o seu xogo sobre a pista xa facía presaxiar que o trunfo estaba preto.
Un encontro no que novatas como Sol Pedrera volveron destacar, pero a protagonista foi a gardameta Ana Lastra, autora de dous goles. O equipo no seu conxunto deu mostra de que, con traballo e dedicación, o Cidade de As Burgas segue moi vivo na Primeira División.
O rival desta xornada non o porá nada doado. O Penya Esplugues gañou tres dos sete partidos que disputou, un deles ante o Cidade de As Burgas na primeira xornada competitiva. Aquel 17 de outubro as ourensás perderon en terras catalás por un contundente 6-1.
A ida serviu de trampolín para as novatas do Cidade de As Burgas
Aquel partido supuso a estrea de tres das catro xogadoras debutantes do conxunto de Codeso. Meses despois, Fara Antolín, Sol Pedrera, África Pazos e Carlota Garayzabal (que debutou ante o Futsti Atlético) seguen medrando nas filas do Cidade de As Burgas.
Elas e as súas compañeiras deberán facer fronte a un Penya Esplugues que chega a este estreo do 2021 dunha derrota na competición regular. Foi ante outro equipo galego, o Poio Pescamar, que venceu ás catalás por dous tantos a cero.
A derrota non supuso unha baixada de posición do Penya na táboa, onde mantense na sexta posición con nove puntos. Dous postos máis abaixo están as ourensás do Cidade de As Burgas, que suman catro puntos con 17 goles a favor e 28 en contra.
Unha traxectoria que as xogadoras que adestra Manolo Codeso agardar revertir nesta segunda volta competitiva, na que os esforzos deben seguir dando os seus frutos para evitar o descenso da máxima categoría.
