As futbolistas do Cidade de As Burgas buscan na quinta xornada desquitarse da goleada sufrida na anterior pero o seu rival non o porá nada doado. As ourensás xogarán contra o Sala Zaragoza na súa pista, nun partido programado para o sábado, 24 de abril, ás 17:00 horas.
Atendendo á clasificación, as mañas parten en mellor posición. As locais ocupan a terceira posición, cun coeficiente do 1,444 puntos, con oito vitorias, dous empates e oito derrotas. Unha delas foi na anterior xornada, cando o Sala Zaragoza caeu ante o CD Leganés por un 2-1.
Como contrapunto a favor do Cidade de As Burgas, as mañas non poderá contar con Ana Etayo. A porteira perderase o que resta de tempada por unha lesión no cóbado dereito, ao sufrir unha rotura trabecular no cortical posterior e edema ósea en olécranon.
O Cidade intentará recuperarse da dura derrota da anterior xornada
As xogadoras que adestra Manolo Codeso aproveitaran a viaxe lonxe do Paco Paz para recuperarse da xornada anterior. As ourensás caeron por un 0-5 ante o Rayo Majadahonda, un rival directo, nun partido que complicou as opcións de permanencia do Cidade de As Burgas.
Actualmente, as galegas ocupan a última praza do descenso, estando a unha posición da salvación. Con dúas vitorias, tres empates e 12 derrotas, o Cidade suma un coeficiente do 0,529, quedando por detrás do Viaxes Amarelle.
Co partido desta xornada, que pecha a primeira volta da segunda fase, as pupilas de Codeso deberán loitar pola vitoria para seguir metidas na permanencia.
