“A nosa situación é crítica en puntos pero non é crítica en xogo. Que sigan confiando en nós que imos seguir traballando e chegaremos á segunda volta con máis forza que nunca. Teño moita fe nestas xogadoras”, aseguraba o adestrador do Cidade, Manolo Codeso, tras o partido.
Estalle custando máis da conta ao Cidade de As Burgas sacar bos resultados no que vai de tempada. As de Manolo Codeso seguen coa boa dinámica de xogo, que veñen practicando nas últimas xornadas, pero sin o premio da vitoria.
Neste caso, o rival foi o Leganés FS que puxo por momentos en dificultades as ourensás. Xa avisaba Codeso, durante a previa, do perigo que tiñan as madrileñas. O Cidade arrincaba o duelo con Ana López Lastra en portería, Lucía, Nahir, Clara e Sonia. Con este quinteto inicial foi dominador absoluto durante toda a primeira parte.
Adiantouse o conxunto adestrado por Codeso no ecuador do primeira parte. A xogada do gol de Clara chegaba tras un gran pase de Sonia e poñía xustiza no marcador. Ao filo do descanso, as ourensás puideron ampliar a ventaxa con varias ocasións moi claras, pero a falta de acerto deixou sen o merecido premio para as galegas.
Gran actuación da gardamallas, Ana López
O Leganés, tras os minutos de refresco, saíu á pista dos Remedios con moito empuxe e con ganas de igualar o choque. Cando o equipo máis o necesitaba, apareceu a figura da cancerbeira, Ana López que con tres grandes intervencións freou a reacción do Leganés ao gol inicial das galegas. O Cidade ten unha pantera baixo paus.
O adestrador local quixo ter unhas palabras sobre a súa gardamallas: “Nas últimas xornadas Ana está a ser espectacular. É unha xogadora que reflicte moito o que é este club. Está a un gran nivel e nos momentos difíciles sempre está aí. Para min está entre as mellores de España”.
O conxunto do sur de Madrid encontrou o agasallo de Navidad cun gol a falta a 7 minutos para o final do partido. Os nervios e as présas non son boas conselleiras e fruto de éstas, o Leganés quedábase cunha xogadora menos por expulsión de Patri Montilla. Deste xeito, as madrileñas xogaron con inferioridade a falta de 2 minutos para o pitido final.
“Cando nos empataron, chegáronnos as présas e os nervios e aí se que nos precipitamos e mesmo puideron anotar o segundo. Coa expulsión de Patri Montilla tivemos a opcion de xogar con superioridade e poñernos por diante”, matizou Codeso tras o partido.
A pesar do último empurrón das galegas, que xogaban en superioridade numérica, o resultado non chegaba para tristeza da afección local que vibraba coas súas nos Remedios. “Preocuparíame moito se imos valorar só a primeira volta ou se o equipo tivese medo aos rivais, pero non é así. É todo o contrario”. Transmitiu o técnico galego toda a ilusión que vive o equipo ourensán dentro do vestiario a pesar de que non cheguen as merecidas vitorias.
Tras o encontro, o técnico das ourensás analizou o acontecido na tarde do sábado en Ourense: “Teño a sensación de que hoxe perdimos dous puntos. Como leva acontecendo nas últimas xornadas estamos a ser superiores ao rival pero non chegan os resultados. Por xogo e por dominio este equipo merece moito máis. Foi unha pena non anotar o segundo e terceiro no marcador para matar o partido. Elas ata o minuto 35 case non nos crearon perigo e nós, non fomos capaces de anotar para ampliar a diferenza”.
Ante a falta de gol do conxunto galego, Codeso dixo que “o equipo está a xogar mellor que nunca, estamos a ser superiores a moitos rivais. Fáltanos gol e unha xogadora que meta os goles. Outros clubs ficharían a un goleadora pero nós non somos así, somos un club de casa. Temos que ter paciencia e confiar en nós mesmos. Na segunda volta por méritos temos que conseguir máis puntos”.
A vindeira xornada o conxunto ourensán volverá a xogar na casa contra outro rival directo pola salvación, o Xaloc Alacant F.S. “A”.
