Despois dunha obrigada xornada de descanso, ao non poder disputar o partido ante o Poio Pescamar polos casos de COVID-19 no seu plantel, o Cidade de As Burgas GLS volve á Liga. O fai enfrontándose a un rival forte, o STV Roldán, que actualmente ocupa a cuarta posición. O duelo será o sábado, 7 de febreiro, ás 15:30 horas.
Na derradeira xornada, as ourensás rozaron a vitoria coas puntas dos dedos, pero os puntos escapáronselles nos segundo finais, cando o CD Leganés FS foi quen de empatar.
O trunfo era vital para as xogadoras ás ordes de Manolo Codeso. O xoven plantel do Cidade de As Burgas é o antepenúltimo do Grupo A da Primeira División do Fútbol Sala con dous empates e unha vitoria.
O Cidade ten posibilidades ante o Roldán
No partido de ida, o Roldán fíxose co encontro en terras ourensás sen moitas complicacións, logrando vencer por un 2-4.
Este partido foi a primeira vitoria para as murcianas, que desde entón puntuaron en seis ocasións máis, situándose na cuarta posición con 17 puntos, a cinco do líder, o Futsi Atlético Navalcarnero.
Porén, o Cidade de As Burgas está a ter unha traxectoria ascendente. En cada partido as melloras no plantel que adestra Manolo Codeso fanse evidentes sobre a pista e a pasada fin de semana case vencen ao Leganés, unha posición por debaixo do Roldán.
Ademais, o rival deste sábado leva un mes sen xogar. Na xornada 12 ás murcianas tocáballes descansar e na 11 o seu rival era o Poio Pescamar, que tivo que adiar a cita por positivos no seu club. Tampouco puideron xogar a semana anterior, ante o Futsi Atlético.
Así, o seu último partido da competición regular foi ante o Leganés un 12 de decembro, perdendo o duelo e a racha de imbatibilidade. Xa no mes de xaneiro, as xogadoras do Roldán caían eliminadas da Copa da Raíña cunha derrota ante o Universidad de Alicante.
Por isto, as ourensás terán unha oportunidade que non poden desperdiciar para aproveitarse do estado do rival e avanzar na clasificación sumando puntos.
