O Cidade de As Burgas salvou hoxe un punto de partido por manter a categoría. As galegas remontaron e impuxéronse ao Xaloc, pechacancelas da categoría, e rival directo pola salvación.
Había moito en xogo no pavillón de Os Remedios e o choque comezou con maior intensidade das ourensás que controlaban o tempo de partido. O conxunto alicantino, non perdeu a cara ao duelo e tamén propuxo un xogo moi intenso. Os dous sabían que o perdedor podería quedar moi tocado.
Manolo Codeso, adestrador do Cidade de As Burgas: “O partido foi moi duro, xa se viu no marcador. Nós dominamos no primeiro tempo pero fomos ao descanso perdendo pola mínima. No tempo de lecer falamos e sabíamos que non podíamos tirar a tempada en 20 minutos. Por sorte, iso non pasou e as xogadoras responderon moi ben na segunda parte”.
As locais tiveron as mellores ocasións de gol do primeiro acto, pero serían as alacantinas quen tras abortar unha contra local facían o propio ata anotar o 0 a 1 nas botas de Miriam. Tocaba volver a remar e facer unha gran segunda parte para conseguir os tres puntos e coller aire.
Tras a reanudación, o conxunto que dirixe Manolo Codeso, partía na cancha disposto a darlle a volta ao curso do envite, tentado subir a intensidade na súa presión e intensificar os envíos en longo. Tras varios intentos, o gol do empate chegaba nunha boa acción de Amelia desde a zona de pivote, aínda que un pouco escorada, remataba á escuadra e poñía á afección local coa emoción a flor de pel.
Manolo Codeso, adestrador do Cidade de As Burgas: “Corriximos unhas cousas no descanso e as xogadoras responderon moi ben e déronse conta de que podían remontar. Tamén temos que dar as grazas a nosa afección que co seu apoio puidemos remontar o partido. O 2-1 de Clara, deunos moita tranquilidade”.
O choque entraba no tramo final con todo por decidir e dous equipos querían levar os tres puntos. O equiopo galego conseguía a merecida recompensa tras unha xogada de toque partindo desde cancha propia, Clara Fernández recibía un pase de Sonia ao segundo pau e as ourensás remontaban o gol inicial. As visitantes tentaron ata o último segundo un empate que non chegaría para ledicia da afección ourensá.
O Cidade, con esta vitoria suma oito puntos e colle aire para afrontar unha segunda volta con todo en xogo.
Manolo Codeso, adestrador do Cidade de As Burgas: “É o que ten esta categoría que todos os rivais son complicados, o Xaloc vai último pero é un gran equipo que nos puxo as cousas moi difíciles. Por fin vemos reflectido o todo o traballo que estamos a facer en puntos. Creo que é moi merecido polo gran traballo das nosas xogadoras e polo apoio da nosa afección que sempre está connosco”.
FICHA TÉCNICA
CIDADE DE AS BURGAS: Ana López Lastra; María Arias, Lucía Nespereira, Clara Fernández e Sonia (quinteto inicial). Tamén xogaron, Amelia, Nahir e Canolich.
XALOC ALACANT: Toñi; Ortiz, Miriam, Teresa e Angie (quinteto inicial). Tamén xogaron, María, Claudia Marín, Irene Sáez, Elena, Lara e Eva Martínez.
GOLES:
0-1, min. 16 Miriam
1-1, min. 30 Amelia
2-1, min. 37 Clara Fernández
COLEXIADAS: Bernardo Carrera e Gael García do colexio galego. Recibiron cartolina amarela Nahir no Cidade e Ortiz no Xaloc
Pavillón dos Remedios. Ante máis de 400 espectadores.
