O Cidade de As Burgas quere ser de primeira

Tras o gol, ambos equipos intercambiábanse ocasións de gol, nunha delas, Laura Boix non acertaba a remachar soa na área ao segundo pau e o Cidade dispoñía dunha tripla ocasión cun remate ao pau. As ourensás chegaban máis metidas no tramo final da primeira parte, aínda que sería Livia cun remate ao pau a que estivo a piques de conseguir a igualada.

Con partido marcado pola intensidade e as múltiples ocasións, chegábase ao descanso coas de Codeso por riba no luminoso, 1-0. Malas novas para as galegas, cando o Sala Zaragoza conseguía igualar o partido aos 25 de xogo, por mediación de Jeni culminando unha contra en superioridade, que colleu descolocada a zaga local.

Pouco despois as visitantes dispuxeron dunha dobre ocasión para voltear o luminoso pero foron as ourensás, ao fío da medianía do período, cando estrelaban un novo remate na madeira, esta vez con remate de María. As pupilas de Manolo Codeso querían devolver todo o apoio do pavillón de Os Remedios cunha vitoria. E así foi.

Ao desenlace chegábase co Cidade con cinco faltas, aínda que cando máis se envorcaba o conxunto maño na portería defendida por Ana López chegaba o 2 a 1 obra de Sonia. A capitana superou no man a man a Suzan e puxo por riba no marcador as galegas. Os Remedios era unha caldeira.

Xa co xogo de cinco das aragonesas, Ana López puxo o terceiro e definitivo tanto no luminoso tras roubo de balón. A gardamallas tivo a cruz da moeda pouco despois, cando era expulsada por dobre cartón amarelo. O Sala puido recortar distancias nos estertores do choque cun remate ao pau de Livia pero os tres puntos quedaron nos Remedios. O Cidade de As Burgas quere seguir soñando e seguir sendo de primeira o vindeiro ano.